Veiði

Neðri hluti Langár að fyllast af laxi

Karl Lúðvíksson skrifar
Veiðin í Langá er komin á fullt skrið.
Veiðin í Langá er komin á fullt skrið. Mynd: KL

Langá á Mýrum er oft sú á í Borgarfirðinum sem er aðeins seinni til en árnar næst henni en eftir kvöldvaktina í dag er ljóst að hún er komin í gang.

Það hefur verið mikið vatn í ánni eftir 25. júní þegar hún hækkaði um rúmlega metra á tveim dögum.  Síðan þá hefur hún sjatnað í því sem næst er hennar besta vatni.  Áin hefur verið köld og erfið viðureignar og þrátt fyrir góðar göngur framan af hefur takan verið oft á tíðum heldur róleg.  Það breyttist all snarlega í kvöld þegar 24 löxum var landað og annað eins slapp af færum veiðimanna í hávaðaroki og rigningu sem dundi á mönnum við bakkann í kvöld.  

Veiðisvæðið frá Strengjum að Sjávarfossi var kraumandi af laxi og takan var góð eftir því.  Áin er loksins að hlaða sig og laxinn farinn að ganga í meiri mæli upp ána en nú er góð veiði á öllum svæðum neðan Hvítstaðahyls sem er rétt við veiðihúsið og það á aðeins eftir að taka nokkra daga til að efri svæðin þar fyrir ofan komi jafn sterkt inn.  Það má því reikna með að um miðjan júlí verði öll áin komin inn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira