Viðskipti innlent

Skellt í lás á leikdegi

Kristín Ólafsdóttir skrifar
Töluvert verður um lokanir vegna landsleiks Íslands og Nígeríu í dag.
Töluvert verður um lokanir vegna landsleiks Íslands og Nígeríu í dag. Vísir/samsett
Mikil spenna ríkir meðal Íslendinga vegna leiks Íslands og Nígeru á heimsmeistaramótinu í knattspyrnu sem hefst klukkan 15 í dag. Fyrirtæki og stofnanir hyggjast í mörgum tilfellum hleypa starfsfólki sínu snemma heim vegna leiksins og því má víða búast við snemmbúnum lokunum nú síðdegis. En hvar verður lokað fyrir leik?

Stéttarfélögin hætta snemma

Tryggingafélögin VÍS og Sjóvá hyggjast hleypa starfsmönnum heim áður en leikur hefst, Sjóvá lokar klukkan 14 og VÍS klukkan 14:30.

Þá mun fólk víða koma að lokuðum dyrum hjá stéttarfélögunum, hyggist það leita sér aðstoðar á leiktíma, en skrifstofur Rafiðnaðarsambands Íslands loka klukkan 13:30, BHM og sjóðir loka klukkan 14 og Báran stéttarfélag, Efling og VR  klukkan 14:30. Þá hvetur hið síðastnefnda önnur fyrirtæki að gera slíkt hið sama.

Efling lokar klukkan 14:30 í dag.Vísir
Áður hefur komið fram að Íslandsbanki og Landsbankinn muni loka vegna leiksins, sá fyrrnefndi klukkan 15 og sá síðarnefndi klukkan 14. Ekki fengust upplýsingar um það hvort Arionbanka yrði einnig lokað snemma svo gera má ráð fyrir því að þar gildi hefðbundinn lokunartími. Þá lokar Kvika banki dyrum sínum klukkan 15.

Hlé gert á útkeyrslu hjá Póstinum

Ýmsum verslunum verður einnig lokað vegna viðureignar Íslands og Nígeríu. Þar má nefna verslanir Geysis, Thors, Lundans og Fjallraven í miðborg Reykjavíkur og á Akureyri, þar sem það á við. Verslun Pfaff við Grensásveg lokar klukkan 14 og verslun ProGastro í Ögurhvarfi í Kópavogi lokar klukkan 14:30.

Þá lokar á afgreiðslustöðum og í þjónustuveri Póstsins klukkan 14:30 en tímabundið hlé verður gert á annarri starfsemi, þ. á m. útkeyrslu, sem hefst aftur klukkan 17:30.

Útkeyrsla hefst aftur hjá Póstinum klukkan 17:30.Vísir/Ernir

Reykjavíkurborg tekur mið af leiknum

Á vef Reykjavíkurborgar kemur auk þess fram að þjónusta verði með minnsta móti eftir klukkan 15 vegna leiksins. Ekki standi þó til að loka starfsemi á borð við sundlaugar og leikskóla, þó að foreldrar séu hvattir til að sækja börn sín fyrir leik í einhverjum tilvikum.

Leikskólinn Laufásborg, sem er hjallastefnuleikskóli og ekki rekinn á vegum borgarinnar, hefur mælst til þess við foreldra að sækja börnin áður en klukkan slær 15. Matthildur L. Hermannsdóttir, leikskólastjóri Laufásborgar, sagði í samtali við Vísi að foreldrar hafi allir tekið vel í tillögu leikskólastjórnenda en að sjálfsögðu verði ekki skellt alfarið í lás ef einhverjir nái ekki í tæka tíð fyrir klukkan 15.

Kringlugestir geta horft á leik Íslands og Nígeríu í sérstakri HM-stofu á annarri hæð verslunarmiðstöðvarinnar.Vísir/Vilhelm

Kringlan og Smáralind standa opnar

Fiskistofa lokar auk þess klukkan 14, sama gildir um Gallerí Fold og skrifstofur Birtu lífeyrissjóðs sem loka klukkan 14:30. Þá verður Útlendingastofnun lokuð allan daginn vegna starfsdags en ekki kemur fram hvort lokunin tengist leiknum.



Íbúar á höfuðborgarsvæðinu munu þó geta lagt leið sína í tvær stærstu verslunarmiðstöðvar landsins, Kringluna og Smáralind, á leiktíma en þar verður opnunartími með hefðbundnum hætti, frá 11-19 á báðum stöðum. Þá vekur Kringlan sérstaka athygli á HM-stofunni, sem opin er öllum Kringlugestum í rými þar sem verslunin Zara var áður til húsa.


Tengdar fréttir

HM-glaðir Íslendingar byrja helgina snemma

Landsmenn byrja margir fyrr í helgarfríi vegna leiks Íslands klukkan þrjú á föstudaginn. Börn sótt fyrr í leikskóla, fyrirtækjum lokað fyrr og allir skrópa í klippingu. Varað er við töfum sem orðið gætu á umferð í borginni fyrir leikinn.






Fleiri fréttir

Sjá meira


×