Umfjöllun: Ísland - Nígería 0-2 | Bardaginn í gufubaðinu á bökkum Volgu tapaðist

Henry Birgir Gunnarsson í Volgograd skrifar
Svekkelsið var mikið.
Svekkelsið var mikið. Vísir/Vilhelm
Vannýtt tækifæri og of mikill hiti reyndist íslenska liðinu um megn á HM í dag er það mætti Nígeríu. Andstæðingarnir réðu miklu betur við hitann í seinni hálfleik, keyrðu á þreytta Íslendinga og uppskáru tvö mörk.

Stemningin fyrir leik var mögnuð. Fjölmargir Rússar í Íslandstreyjum og þeir voru klárlega mættir til þess að styðja okkar menn. Gæsahúðin kom strax er strákarnir mættu í upphitun og meirihluta stúkunnar fagnaði þeim vel og innilega.

Allt of heitt og breytt um taktík

Það var mikið rætt um hita og flugur í aðdraganda leiksins. Engar voru flugurnar - blessunarlega - en hitinn var mikill. Mjög mikill. 32 stiga hiti er leikurinn byrjaði.

Heimir gerði tvær breytingar á liðinu frá því í fyrsta leiknum. Rúrik kom inn fyrir meiddan Jóhann Berg og Jón Daði kom í framlínuna á kostnað Emils Hallfreðssonar. Heimir fór í 4-4-2 og svekkjandi fyrir Emil sem var frábær í fyrsta leiknum.

Strákarnir byrjuðu leikinn af miklum krafti. Komu sér í sterkar stöður og Gylfa fékk hörkufæri eftir fimm mínútur en skotið aldrei þessu vant lélegt hjá honum.

Það var alveg augljóst að okkar menn ætluðu að spara orkuna í hitanum og tóku sér drjúgan tíma í allar aðgerðir. Það sem kom meira á óvart er að Nígeríumenn gerðu það sama.

Landsliðsfyrirliði Aron Einar Gunnarsson.Vísir/Vilhelm
Skelfilegur fótbolti

Eftir þessa kröftugu byrjun róaðist leikurinn í gufubaðinu í Volgograd. Það reyndar mjög mikið. Áhorfendur gáfu eftir sem og leikmenn í hitanum. Það verður bara að viðurkennast að næsta hálftímann var þetta einn skelfilegur fótboltaleikur.

Nígeríumenn voru meira með boltann en sköpuðu ekkert. Sendingar liðsins skelfilegar og ekkert að frétta. Þeir áttu ekki eina marktilraun í fyrri hálfleik. Ekki eina gegn sex frá okkur. Tvö skot fóru á markið.

Lokakaflinn var mjög góður hjá okkar mönnum og þeir hefði átt að skora á síðustu mínútu hálfleiksins er Alfreð komst í hörkufæri. Á síðustu sekúndum hálfleiksins komust strákarnir aftur í álitlega stöðu en þá vantaði mann til þess að klára.

Hrikalegt að ná ekki inn marki

Það var hrikalegt að hafa ekki refsað í fyrri hálfleik því tækifærin voru svo sannarlega til staðar. Maður fékk á tilfinninguna að það myndi bíta okkar menn í bossann enda erfiðar seinni 45 mínútur eftir í hitanum.

Þegar síðari hálfleikur hófst var ljóst að Nígeríumenn ætluðu ekki að spara bensínið lengur. Þeir áttu sitt fyrsta skot eftir aðeins 14 sekúndur.

Á 49. mínútu tók Ísland innkast á vallarhelmingi Nígeríumanna. Í stað þess að við fengjum færi skölluðu Nígeríumenn frá og brunuðu upp. Við sátum eftir og var refsað fyrir það. Ahmed Musa fékk boltann í teignum og afgreiddi smekklega í netið.

Kári Árnason í skallaeinvígi.Vísir/Vilhelm
Vont getur versnað

Til að gera vont verra þá fagnaði Musa með því hlaupa á Ragnar Sigurðsson í fagninu. Ragnar fékk skurð og fossblæddi úr honum. Hann harkaði af sér, fóru úr blóðugu treyjunni og hélt áfram leik. Skelfileg byrjun á hálfleiknum. Ragnar yfirgaf svo völlinn korteri síðar.

Það gekk allt of illa hjá okkur að halda boltanum og þar af leiðandi sköpuðum við ekki neitt. Föstu leikatriðin voru ekkert að gefa og bensínið virtist lítið hjá okkar mönnum. Við hefðum líklega þurft að geta gert sjö til átta skiptingar miðað við þreytu manna.

Það var aftur á móti fullur bensíntankur hjá Nígeríumönnum sem héldu áfram að bæta í. Musa átti þrumuskot utan teigs í slá á 74. mínútu þar sem Hannes misreiknaði boltann illa. Framherjinn kviki skoraði svo annað mark Nígeríu mínútu síðar.

Stakk Kára af, sólaði Hannes og skoraði. Allt of auðvelt. Okkar menn á hælunum af þreytu. HM-ævintýrið að breytast í martröð.

Gylfi horfir á eftir vítaspyrnunni fara yfir markið.Vísir/Vilhelm
VAR dugði ekki til

Á 80. mínútu var brotið á Alfreð innan teigs. Dómarinn dæmdi ekkert. Skömmu síðar skoðaði hann atvikið aftur. Fór í sjónvarpið og snéri dómnum. VAR að gefa okkur víti og það réttmætt.

Gylfi Þór fór á punktinn. Tók sér óeðlilega langan tíma, hikaði í tilhlaupinu og skaut svo yfir markið. Eins óeðlilegt og það verður hjá Gylfa. Þetta var ekki hans dagur.

Þarna var ljóst að ballið var búið. Við yrðum að kyngja því að tapa þessum leik. Glötuð færi fyrri hálfleiks í bland við hitann felldu liðið. Það var lag en menn nýttu það ekki. Því miður.

Þjálfararnir breyttu um taktík og það gekk ekki upp. Liðið þurfti að vera meira með boltann og það var tækifæri til þess að breyta í hálfleik. Viðurkenna að það sem lagt var upp með væri ekki að virka nógu vel. Setja Emil inn og færa Gylfa ofar. Það var ekki gert.

Þreyttir í síðari hálfleik varð eltingarleikurinn sífellt erfiðari. Gylfi þess utan ekki með sinn besta leik. Skot og sendingar ekki í þeim klassa sem við vitum að hann býr yfir. Ef Gylfi er ekki í stuði þá á íslenska landsliðið erfitt með að vinna fótboltaleiki.

Birkir Bjarnason komst ekkert í takt við leikinn og Alfreð fékk ekki úr miklu að moða. Birkir Már fékk mörg tækifæri með hálfan völlinn en nýtti það illa. Rúrik of sjaldan áræðinn og svona mætti áfram telja.

Aftur gefa föstu leikatriðin okkur ekkert. Liðið var meira að segja gripið í bólinu eftir fast leikatriði. Meðan svo er þá á Ísland ekki möguleika. Þetta var líka í fyrsta sinn sem íslenska liðið skoraði ekki í leik á stórmóti. Þetta var vondur dagur.

Gylfi skýtur yfir úr vítinu.Vísir/Vilhelm
Förum íslensku leiðina

Þetta var ekki okkar dagur og leikurinn þar sem við áttum fyrir fram mestan möguleika á að vinna tapaðist. Þessi leikur átti að vera skref fram á við frá síðasta móti en það gekk ekki. Við erum enn að læra.

Það er aftur á móti ekkert íslenskara en að fara erfiðu leiðinu. Krýsuvíkurleiðina. Þessir strákar eru ekkert hættir og þeir munu leggja allt undir gegn Króötum. Þeir hafa unnið þá áður. Af hverju ekki aftur? Þetta er ekki búið.

Bein lýsing

Leikirnir






    Fleiri fréttir

    Sjá meira