Formúla 1

Upphitun fyrir Austurríki: Barátta Hamilton og Vettel heldur áfram

Bragi Þórðarson skrifar

Níunda umferðin í Formúlu 1 fer fram í Austurríki um helgina. Franska kappakstrinum lauk um síðustu helgi og svo halda liðin til Bretlands eftir rúmlega viku.

Það er því nóg að gera hjá keppendum og gætu þessar þrjár vikur haft mikið að seigja í baráttunni um heimsmeistaratitilinn. Þetta er í fyrsta skiptið í sögu íþróttarinnar sem haldnar eru þrjár keppnir á þremur vikum.

Fyrir franska kappaksturinn hafði Sebastian Vettel hjá Ferrari eins stiga forskot á aðal keppinaut sinn, Lewis Hamilton, sem ekur fyrir Mercedes.

Hamilton hefur forystuna. vísir/getty

Hamilton á undan
Hamilton hafði þó betur á Paul Ricard brautinni og leiðir nú mótið með 14 stiga forskot á Vettel. Báðir þessir ökumenn hafa á tímabili verið með 17 stiga forskot á hinn á þessu ári. Það er því alveg ljóst að þetta einvígi mun endast út allt tímabilið, en báðir ökumenn eiga fjóra ökumannstitla í Formúlunni.

Þessir tveir virðast vera í algjörum sérflokki, þó má ekki gleyma Daniel Ricciardo sem er þriðji í mótinu og hefur nú þegar unnið tvær keppnir á sínum Red Bull.

Liðsfélagi Hamilton hjá Mercedes, Valtteri Bottas, hefur verið alveg svakalega óheppinn á árinu og situr því í fjórða sæti. Finninn var meðal annars að leiða Bakú kappaksturinn þegar að dekk sprakk á bíl hans á síðasta hring og þurfti Bottas því frá að hverfa.

Bottas hefur allan hraðann til að vinna en hvað gerir hann nú? vísir/getty

Hvað gerir Bottas?
Það er ljóst að Bottas hefur hraðann til að vinna. Annað er þó upp á teningnum hjá liðsfélaga Vettel hjá Ferrari, Kimi Raikkonen. Það virðist vanta allan neista í þennan 38 ára Finna, til að mynda hefur Kimi tapað sætum í fyrstu beygju í öllum keppnum ársins.

Í fyrra var það Bottas sem fagnaði öruggum sigri á Red Bull brautinni í Austurríki. Mercedes hafa haft yfirhöndina á Ferrari í kappakstrinum síðastliðin ár og Red Bull eru enn að bíða eftir heimasigri.

Ferrari og Red Bull þurfa á því að halda að vinna Mercedes bílana, þar sem þýski bílaframleiðandinn er kominn með 23. stiga forskot í keppni bílasmiða.

Æfingar, tímatökur og svo að sjálfsögðu kappaksturinn sjálfur verður allt í beinni útsendingu á Stöð 2 Sport um helgina.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.