Innlent

Spyr hvort ríkisstofnun sé pólitískt misnotuð

Kristján Már Unnarsson skrifar
Gunnar Bragi Sveinsson, varaformaður Miðflokksins.
Gunnar Bragi Sveinsson, varaformaður Miðflokksins. Stöð 2/Sindri Reyr Einarsson.
Skipulagsstofnun er sökuð um að fara út fyrir valdmörk sín í samskiptum við Árneshrepp og þingmaður ýjar að því að hún sé misnotuð með pólitískum hætti. Forstjóri Skipulagsstofnunar vísar á bug slíkum aðdróttunum. Fjallað var um málið í fréttum Stöðvar 2. 

Átökin um Árneshrepp vegna Hvalárvirkjunar halda áfram en í grein í vestfirska miðlinum Bæjarins besta sakar varaþingmaðurinn og lögfræðingurinn Teitur Björn Einarsson Skipulagsstofnun um að vega að sjálfsstjórn sveitarfélaga og fara út fyrir valdheimildir sínar í samskiptum sínum við Árneshrepp. 

„Skipulagsstofnun hefur sannarlega lögbundið hlutverk að hafa eftirlit með framkvæmd skipulagslaga. Í þessu tilviki er stofnunin að spyrja um tiltekin atriði sem hafa ekkert með efni eða form skipulagslaga að gera. Og þar með er stofnunin komin út fyrir valdsvið sitt, að mínu mati,“ segir Teitur Björn.

Teitur Björn Einarsson, lögfræðingur og varaþingmaður Sjálfstæðisflokksins.Stöð 2/Sindri Reyr Einarsson.
Í Morgunblaðinu í dag ýjar Gunnar Bragi Sveinsson, varaformaður Miðflokksins, að því að Skipulagsstofnun sé pólitískt misnotuð. 

„Mér finnst bara framganga Skipulagsstofnunar varðandi Árneshrepp og Hvalárvirkjun hafa verið með slíkum hætti að það sé full ástæða til að velta því fyrir sér hvort stofnunin sé notuð með einhverjum pólitískum hætti.“ 

-Hver er að misnota hana? 

„Ég velti því upp í þessari grein; getur verið að það sé eitthvert samband á milli félagsskapar eins og Landverndar, milli ráðherra sem er fyrrum framkvæmdastjóri Landverndar, - ég er bara að velta þessu upp. Ég er ekki að segja að þetta sé til staðar. En það er mikilvægt að við höfum hreint borð í þessu því það er svo mikið í húfi þarna fyrir vestan,“ segir Gunnar Bragi. 

Teitur Björn segir að svo virðist sem Skipulagstofnun hafi brotið lög með því að virða ekki lögbundinn tímafrest. 

„Stofnuninni ber að svara sveitarfélaginu innan fjögurra vikna frá því erindi barst. Mér sýnist að sá tími sé löngu liðinn,“ segir Teitur Björn.

Ásdís Hlökk Theodórsdóttir, forstjóri Skipulagsstofnunar.Vísir/GVA.
Forstjóri Skipulagsstofnunar, Ásdís Hlökk Theodórsdóttir, baðst undan viðtali á þessu stigi, þar sem umrædd mál væru enn til meðferðar hjá stofnuninni. 

„Hinsvegar vil ég koma á framfæri að ég vísa alfarið á bug aðdróttunum sem fram koma í umræddum skrifum um að stofnunin sé handbendi ráðherra, geri framkvæmdaáform tortryggileg, fari út fyrir lögbundið hlutverk sitt og þar fram eftir götunum," segir Ásdís í skriflegu svari við ósk fréttastofu um viðtal. 

„Skipulagsstofnun starfar á grundvelli skipulagslaga og hefur eftirlit með framkvæmd þeirra. Í því felst að hafa eftirlit með skipulagsgerð sveitarfélaga. Stofnunin staðfestir aðalskipulag, sem áður hefur verið samþykkt af viðkomandi sveitarstjórn. Stofnuninni ber við þá afgreiðslu að fara yfir form og efni aðalskipulagsins, en það getur varðað málsmeðferð sveitarfélags við kynningu og afgreiðslu skipulagsins, framsetningu skipulagsins og efni þess. 

Stofnunin þarf iðulega að leita eftir skýringum, frekari upplýsingum eða leiðréttingum frá viðkomandi sveitarfélagi þegar henni hefur borist aðalskipulag til staðfestingar. Stofnunin kappkostar að sinna verkefnum sínum og hlutverki af kostgæfni og fagmennsku og virða þær reglur sem um störf hennar gilda," segir Ásdís Hlökk í svari sínu. 

„Ég er ekki að ásaka neinn. Við þurfum bara að hafa þetta á hreinu. Það þarf að vera traust til þessara vinnubragða sem þarna eru. Ég held að það traust sé ekki til staðar,“ segir Gunnar Bragi Sveinsson, varaformaður Miðflokksins.

Hér má sjá frétt Stöðvar 2:

 


Tengdar fréttir

Aðför sem lýsir virðingarleysi og fádæma dómgreindarleysi

Formaður Fjórðungssambands Vestfirðinga segir atburðina í Árneshreppi grófa aðför að sjálfsákvörðunarrétti sveitarfélags. Þetta sé sambærilegt því ef 40 þúsund íbúar á landsbyggðinni myndu skrá sig til málamynda í Reykjavík til að hafa áhrif á flugvöllinn í Vatnsmýri.

Stórar ákvarðanir bíða hreppsnefndar

Varaoddvitinn í Árneshreppi þar sem hart er deilt um fyrirhugaða Hvalárvirkjun segir þá sem skráð hafa lögheimili sitt í hreppinn að undanförnu hljóta að hafa gert það til að taka þátt í sveitarstjórnarkosningunum. Hann viti þó ekki hvað þetta fólk ætli sér að kjósa.




Fleiri fréttir

Sjá meira


×