Innlent

Samið um afgreiðslu þingmála í veipfylltum bakherbergjum

Gunnar Hrafn Jónsson skrifar
Eins og alltaf þarf Alþingi að afgreiða fjölda mála með atkvæðagreiðslu á lokametrunum áður en þingið getur farið í frí
Eins og alltaf þarf Alþingi að afgreiða fjölda mála með atkvæðagreiðslu á lokametrunum áður en þingið getur farið í frí
Alls voru 14 lagafrumvörp borin upp til fyrri atkvæðagreiðslu á Alþingi á stuttum þingfundi sem hófst klukkan hálf átta í kvöld og var frestað innan við korteri síðar. Öll frumvörpin voru samþykkt með miklum meirihluta en um er að ræða 12 stjórnarfrumvörp frá ráðherrum og 2 frumvörp frá meirihlutum fastanefnda. Öðrum atkvæðagreiðslum hefur verið frestað til morguns.

Þá var eitt frumvarp borið upp til seinni atkvæðagreiðslu og samþykkt þannig að það verður að lögum. Það var frumvarp um jafna meðferð óháð kynþætti og þjóðernisuppruna sem var lagt fram af félags- og jafnréttismálaráðherra. Já sögðu 53 þingmenn og 9 greiddu ekki atkvæði, allir úr Miðflokknum, Sjálfstæðisflokknum eða Flokki fólksins.

Meðal þeirra mála sem voru samþykkt í fyrri atkvæðagreiðslu í kvöld eru lagafrumvarp meirihluta efnahags- og viðskiptanefndar um Kjararáð og bann við tilteknum frammistöðubætandi efnum og lyfjum, sem hefur verið nefnt sterafrumvarpið.

Alþingi hafði áður fellt breytingartillögu Pírata við frumvarpið um Kjararáð sem fól í sér að gera Kjararáð afturreka með fyrri ákvörðun um launahækkanir Alþingismanna og ráðherra og lækka laun þeirra aftur. Aðeins þingmenn Pírata og Samfylkingar greiddu atkvæði með þeirri tillögu við aðra umræðu fumvarpsins.

Við fyrstu atkvæðagreiðslu greiddu 48 þingmenn atkvæði með frumvarpinu, einn var fjarverandi og 14 greiddu ekki atkvæði, þar á meðal allir 6 þingmenn Pírata.

Sterafrumvarp Óttars gengur aftur

Tvær breytingartillögur voru gerðar við sterafrumvarpið við aðra umræðu, frumvarpið það var upphaflega lagt fram af Óttari Proppé þegar hann var heilbrigðisráðherra en náði ekki fram að ganga áður en sú stjórn féll.

Ólafur Þór Gunnarsson, þingmaður Vinstri Grænna, lagði til að bæta við málsgrein þess efnis að varsla eða meðferð þeirra efna og lyfja sem frumvarpið fjallar um skuli aðeins vera refsiverð þegar magnið er umfram það sem talist getur til eigin neyslu.

Var sú breytingartillaga samþykkt með 56 atkvæðum gegn 7. Allir þingmenn studdu breytingartillöguna nema 7 þingmenn Miðflokksins sem allir sögðu nei við þessari breytingu.

Minnihluti velferðarnefndar lagði til breytingartillögu sem fól í sér að ráðherra skyldi falið að skilgreina í reglugerð hvað teldist dagskammtur af hverju lyfi. Fella skyldi niður refsingu í málum þar sem um væri að ræða 10 dagskammta eða færri þar sem efnin væru ætluð til eigin neyslu. Var sú tillaga felld með 26 atkvæðum gegn 37 en frumvarpið sjálft var síðan samþykkt með 62 atkvæðum en aðeins dómsmálaráðherra var fjarverandi atkvæðagreiðsluna, enda væntanlega önnum kafin við að vinna í afgreiðslu frumvarps um persónuvernd og vinnslu persónuupplýsinga.

Veipfyllt bakherbergi

Stefnt er að því að ljúka þingstörfum á morgun en eins og oft áður hafa formenn flokkanna haldið að sér spilunum til að reyna að ná sem mestu fram í samningaviðræðum á bak við tjöldin.

Nú þegar er búið að fresta afgreiðslu frumvarps um lækkun veiðigjalda fram á næsta þing eins og stjórnarandstaðan hafði krafist.

Einhverjar viðræður hafa verið í gangi um afgreiðslu fyrrnefnds frumvarps dómsmálaráðherra um persónuvernd og vinnslu persónuupplýsinga.

Töluvert hefur verið deilt um frumvarpið sem stjórnarandstaðan segir alltof viðamikið til að samþykkja á lokametrum þingsins. Boðað var til fundar í allsherjar- og menntamálanefndar klukkan 19 í kvöld, fyrir þær atkvæðagreiðslur sem nefndar eru að ofan, til að reyna að skera á hnútinn.

Þingfundur hélt áfram klukkan 21:17. Opnað var fyrir þriðju umræðu um hið umdeild rafrettufrumvarp, eða veipfrumvarpið, en enginn kvaddi sér hljóðs og var atkvæðagreiðslu frestað. Samkvæmt heimildum fréttastofu verður öllum þeim atkvæðagreiðslum, sem eftir eru, frestað til morguns.


Tengdar fréttir

Íslandsstofa tafði fyrir sátt um þinglok

Eftir sleitulausar samningaviðræður stjórnar og stjórnarandstöðu síðustu daga virðist sátt vera að nást um þinglok. Frumvarp um Íslandsstofu var hvað erfiðast að semja um.




Fleiri fréttir

Sjá meira


×