Innlent

Vonast eftir góðu samstarfi við minnihlutann í Reykjavík

Jóhann Óli Eiðsson skrifar
Svona skipta flokkarnir með sér verkum í borginni.
Svona skipta flokkarnir með sér verkum í borginni. Fréttablaðið

REYKJAVÍK Borgarstjórnarfulltrúar nýs meirihluta eru stórhuga fyrir kjörtímabilinu sem nú er hafið. Þeir segja að samningaviðræður um myndum meirihluta hafi gengið vel og mikill samhljómur hafi verið milli flokkanna.

Að baki meirihlutanum standa Samfylkingin, Viðreisn, Píratar og Vinstri græn. Flokkarnir fengu samtals tólf fulltrúa af 23 mögulegum. Meirihlutinn er því aðeins einn maður.

„Þó við spönnum allt hið pólitíska litróf þá kom í ljós að í stærstu málunum vorum við í grunninn sammála. Við lögðum mikið upp úr því að mynda liðsheild og að það væru opin samskipti og samvinnugrundvöllur,“ segir Þórdís Lóa Þórhallsdóttir, oddviti Viðreisnar og nýr formaður borgarráðs.

Lóa segir að nýr meirihluti vilji á kjörtímabilinu stefna að víðtæku samráði við minnihlutann. Í kosningabaráttunni hafi allir flokkar komið fram með mál sem þeir brenna fyrir og margt af því sem minnihlutaflokkarnir hafi lagt til hafi líka verið að finna í stefnu meirihlutans.
Sjá einnig: Borgarlína, húsnæðismál og leikskólamál í aðalhlutverkum sáttmála nýs meirihluta

„Ég er bjartsýnn fyrir kjörtímabilið. Það er gleðiefni að stór, öflugur og góður hópur fólks úr ólíkum áttum hafi ákveðið að taka höndum saman um að þróa græna, fjölbreytta og nútímalega borg, sem leggur áherslu á gott skóla og velferðarkerfi, góða þjónustu, öruggt húsnæði og öflugt atvinnulíf – og er jafnframt borg fyrir alla. Meirihlutinn er myndaður um jákvæða borgarþróun, skipulags og samgöngumál, húsnæðismál og borgarlínu og sókn á öllum sviðum,“ segir borgarstjórinn Dagur B. Eggertsson.

Í sáttmála meirihlutans segir að stefnt sé að því að hraða uppbyggingu íbúðarhúsnæðis og að brúa bilið milli fæðingarorlofs og leikskóla með fjölgun ungbarnaleikskóla. Þá verði jafnrétti meðal annars tryggt með því að eyðublöð geri ráð fyrir öllum kynjum og úttektir verði gerðar á búningsherbergjum og salernum borgarinnar. Strætó muni aka oftar á háannatímum og gjaldskyldum bílastæðum fjölgar og gjaldskyldutími lengdur.

„Það sem stendur upp úr sáttmálanum fyrir mitt leyti er tvennt. Annars vegar hugum við vel að atvinnulífinu, pössum upp á fjölbreytni þess og tryggjum að það geti vaxið og dafnað. Hitt málið er að þjónusta við borgarbúa og fyrirtæki verði notendavædd en þar eru gríðarleg sóknarfæri,“ segir Lóa. Stefnt verður að því að gera þjónustuna auðveldari, miðlægari og aðgengilegri bæði fyrirtækjum og einstaklingum.

„Það skiptir miklu máli að hafa stöðugleika í borgarstjórn og borgarráði. Samvinna og áreiðanleiki skiptir máli til að allt gangi upp, ekki síst fyrir borgarbúa sjálfa. Við verðum að halda ákveðið áfram, sýna stöðugleika og taka ábyrgar ákvarðanir,“ segir Lóa.

joli@frettabladid.is


Tengdar fréttir

Einn leikskóli í hverju hverfi opinn næsta sumar

Þórdís Lóa Þórhallsdóttir, oddviti Viðreisnar í borgarstjórn og nýr formaður borgarráðs, segir að nýr meirihluti í Reykjavík muni koma til með að hafa mikil áhrif á allt sem snýr að barnafjölskyldum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.