Innlent

Meirihlutasáttmálinn fráleit niðurstaða

Margrét Helga Erlingsdóttir skrifar
"Sáttmálinn afhjúpar að meirihlutaflokkarnir lifa í annarri Reykjavík en við sósíalistar.“
"Sáttmálinn afhjúpar að meirihlutaflokkarnir lifa í annarri Reykjavík en við sósíalistar.“

Sanna Magdalena Mörtudóttir, oddviti Sósíalistaflokks Íslands í Reykjavík, segir að málefnasamningur nýs meirihluta í borginni sé fráleit niðurstaða í ljósi þess sem flokksmenn hefðu haldið fram í aðdraganda kosninga. Í kosningabaráttunni hefðu ákveðin mál verið fyrirferðamikil á borð við húsnæðiskreppuna, láglaunastefnu og hagsmunamál hinna verst settu en í sáttmálanum séu engar aðgerðir boðaðar „sem máli skipta“ til að bæta lífskjör láglaunafólks.

Þetta kemur fram í tilkynningu frá Sósíalistaflokki Íslands.

„Þeir brauðmolar sem þau fá eru bæði fáir og smáir,“ segir Sanna og bætir við að meirihlutinn ætli sér að reka nánast óbreytta húsnæðisstefnu – stefnu sem miði að því að láglaunafólk beri allan kostnað af kreppunni.

„Hin verr stæðu í Reykjavík hafa tekið á sig gríðarlegar hækkanir húsaleigu vegna húsnæðiskreppunnar og þær hækkanir hafa étið upp ráðstöfunarfé þeirra fjölskyldna sem síst mátti við auknum byrðum. Þetta er miskunnarlaus stefna gagnvart fátæku fólki, að varpa öllum kostnaði af vandanum yfir á þau sem síst geta staðið undir því“

Sósíalistar eru ekki ánægðir með nýjan málefnasamning meirihlutans í Reykjavík. Vísir/eyþór

Segja strætóúrræðið ekki gagnast fátækum
Þá þykir Daníel Erni Arnarssyni, varaborgarfulltrúa Sósíalistaflokksins, og Sönnu það gagnrýnisvert að meirihlutinn hafi ákveðið að fella niður fargjöld í strætó fyrir börn 12 ára og yngri sem ferðast í fylgd með fullorðnum. „Hvernig eiga fátækar fjölskyldur að nýta sér þetta? Á einstæða móðirin í láglaunastarfinu að taka sér frí til að geta ferðast með barninu sínu eftir skóla í tómstundir eða í pössun til afa og ömmu? Og til hvers? Svo strætó fái fullt fargjald frá henni frekar en hálft frá barninu?“ Spyr Daníel.

Vilja gjaldfrjálsa skóla
„Gjaldfrjáls skóli er ein af stoðum velferðarkerfisins og forsenda góðs samfélags. Þótt þessar tillögur lækki gjaldtökuna hjá barnmörgum fjölskyldum þá eru þetta aðeins hænuskref sem gagnast fáum. Við Daníel erum bæði uppkomin fátæk börn. Þessar tillögur hefðu engu breytt fyrir okkur eða fátækar mæður okkar. Í dag er hellingur af börnum sem búa við sömu aðstæður og við bjuggum við. Það er ekkert í þessum sáttmála sem mun gagnast þeim börnum. Og það er sorglegt,“ segir Sanna um menntamálin.

„Sáttmálinn afhjúpar að meirihlutaflokkarnir lifa í annarri Reykjavík en við sósíalistar. Ef fólk ber saman okkar tillögur og meirihlutasáttmálann þá sést hversu mikill sannleikur lá í kosningabaráttu sósíalista, sem að hluta var háð undir yfirskriftinni Hin Reykjavík. Stór hluti borgarbúa býr við raunveruleika sem stjórnmálin í Ráðhúsinu ná ekki að snerta, vilja ekki sjá og ætla sér ekki að bregðast við,“ segir Daníel að lokum.


Tengdar fréttir

Pawel hoppar hæð sína vegna yfirlýsingar Sósíalista

Pawel Bartoszek, nýkjörinn borgarfulltrúi Viðreisnar í Reykjavík, er ánægður með ákvörðun Sósíalistaflokksins en hann tilkynnti í gærkvöldi að hann hygðist ekki taka þátt í meirihlutasamstarfi á kjörtímabilinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira