Innlent

Vildi stýra afhjúpun en var afþakkaður

Garðar Örn Úlfarsson skrifar
Sóknarnefndarformaðurinn útvegaði mannskap til að koma legsteini Viggu gömlu fyrir í Skeiðaflatarkirkjugarði. Þar bíður steininn þess að verða afhjúpaður.
Sóknarnefndarformaðurinn útvegaði mannskap til að koma legsteini Viggu gömlu fyrir í Skeiðaflatarkirkjugarði. Þar bíður steininn þess að verða afhjúpaður. Eva Dögg Þorsteinsdóttir

 Jóna Sigríður Jónsdóttir, upphafskona að söfnun fyrir legsteini á gröf förukonunnar Viggu gömlu, segir ekki rétt sem fram kom í máli séra Skírnis Garðarssonar í Fréttablaðinu í gær að ekki væri óskað nærveru hans við afhjúpun steinsins á laugardag.

Séra Skírnir var afleysingaprestur í Vík í Mýrdal nýliðinn vetur í fjarveru séra Haraldar Kristjánssonar og átti síðan að vera út sumarið líka samkvæmt nýlegri ákvörðun. Skírnir, sem er héraðsprestur á Suður landi og hleypur því í skarðið þar sem þörf er á, var hins vegar óvænt leystur undan skyldustörfum í Mýrdal á þriðjudag.

Sjá einnig: Látinn taka poka sinn rétt fyrir vígsluathöfn

„Séra Skírnir sýndi söfnuninni fyrir legsteini strax í upphafi mikinn áhuga og hafði samband við mig og kom með tillögur að því hvernig athöfnin ætti að vera þegar þar að kæmi,“ segir Jóna. Presturinn hafi fylgst með framkvæmdinni af miklum áhuga og verið öðru hvoru í sambandi við hana. Skírnir hafi jafnvel útbúið fullmótaða dagskrá.

Séra Skírnir Garðarsson, héraðsprestur á Suðurlandi.

„Ég hef þakkað honum fyrir áhugann, en sagt honum að við sem stöndum að söfnuninni ætlum að stjórna ferðinni og ákveða hvernig athöfnin komi til með að verða.“ Jóna telur að séra Skírnir hafi látið í það skína í samtölum við Fréttablaðið að hann hafi átt frumkvæði að söfnuninni fyrir legsteininum. 

„Ég vil að það komi skýrt fram að séra Skírnir á engan þátt í að söfnunin fór af stað né hvernig henni var stjórnað. Ég hef heldur aldrei í okkar samtölum óskað eftir aðstoð hans,“ undirstrikar Jóna. Hún segir að í vor hafi Skírnir hringt í hana og sagst á förum úr prestakallinu.

„Hann gæti því ekki séð um athöfnina fyrir okkur. Þess hafði reyndar heldur aldrei verið óskað.“ Þá segir Jóna að hún hafi ætlað að láta Skírni vita af tímasetningu athafnarinnar eins og hann hafi beðið um svo hann gæti verið viðstaddur.

„Allir eru velkomnir á laugardaginn í Skeiðflatarkirkju og því alls ekki rétt sem hann segir, að nærveru hans sé ekki óskað,“ ítrekar hún. 

Einnig gerir Jóna athugasemd við það að Skírnir segi málið hafa valdið usla meðal kirkjufólks. „Ég hef ekki orðið vör við neinn usla heldur þvert á móti hef ég einungis orðið vör við ánægju og gleði yfir að Vigga gamla fái nú loks minnisvarðann sinn.“


Tengdar fréttir

Látinn taka poka sinn rétt fyrir vígsluathöfn

Séra Skírni Garðarssyni sárnar að sóknarprestur sem hann hefur leyst af í Vík verði við vígslu legsteins á gröf flökkukonunnar Viggu gömlu. Skírnir átti að þjóna út sumarið í Mýrdal en var óvænt leystur undan þeirri skyldu sinni

Legsteinn Viggu gömlu tilbúinn fyrir vígsluna

Flökkukonan Vigdís Ingvadóttir úr Mýrdal fær loks legstein rúmum sextíu árum eftir andlátið. Steinn verður afhjúpaður við athöfn í Skeiðflatarkirkjugarði á laugardag. Aðalsprautan í málinu vonast eftir góðri aðsókn þótt athöfnin sé í miðjum HM-leik Íslands og Argentínu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.