Viðskipti innlent

Næststærsta skráning í sögu Kauphallar Íslands

Þorbjörn Þórðarson skrifar
Bjallan var flutt úr Kauphöllinni á Laugavegi niður í Arion banka í Borgartúni þar sem Höskuldur Ólafsson bankastjóri hringdi inn viðskipti með hlutabréf bankans samtímis í Kauphöllunum í Reykjavík og Stokkhólmi.
Bjallan var flutt úr Kauphöllinni á Laugavegi niður í Arion banka í Borgartúni þar sem Höskuldur Ólafsson bankastjóri hringdi inn viðskipti með hlutabréf bankans samtímis í Kauphöllunum í Reykjavík og Stokkhólmi.
Hlutabréf Arion banka voru tekin til viðskipta samtímis í kauphöllunum á Reykjavík og Stokkhólmi í morgun. Skráning Arion banka er næststærsta skráning í sögu Kauphallar Íslands og fyrsta samhliða tvískráning á mörkuðum Nasdaq á Norðurlöndunum í meira en áratug.

Mikil umframeftirspurn var í hlutafjárútboðinu. Grunnstærð þess var að lágmarki 452,5 milljónir hluta en seljendur bréfanna voru Kaupskil, dótturfélag Kaupþings og félagið Trinity Investments.

Gengið í útboðinu voru 68-79 krónur fyrir hvern hlut. Um sjötíu prósent af eftirspurninni kom frá útlöndum sem þýðir að mikið af erlendum fjárfestum koma nú inn í hluthafahóp Arion banka. 

„Ég held að það sé bara jákvætt fyrir bankann að draga að fjölbreyttari flóru fjárfesta en við þekkjum hér. Við höfum líka horft til þess að það geti verið mjög jákvætt fyrir umhverfið. Þegar það koma svona margir erlendir inn í fjárfestamengið hér þá verður meiri áhugi á öðru sem er að gerast hér og við bindum vonir við að það geti falist dýnamík fyrir atvinnulífið og kauphöllina í þessari frábærlega vel heppnuðu skráningu Arion banka,“ segir Höskuldur Ólafsson bankastjóri Arion banka. 

Áskriftir sem sem standa undir 70 prósentum þess hlutafjár sem var í boði komu frá útlöndum eins og áður segir. Höskuldur segir að eftirspurnin sé mjög dreifð. Margir fjárfestanna komi frá Bandaríkjunum en einnig sé talsvert um skráningar frá hinum Norðurlöndunum. 






Fleiri fréttir

Sjá meira


×