Fótbolti

Umsókn Morokkó um HM 2026 staðfest │Kosið 13. júní

Ástrós Ýr Eggertsdóttir skrifar
Tillaga að leikvanginum í Oujda, einum af 14 leikvöngum mögulegrar lokakeppni HM í Morokkó
Tillaga að leikvanginum í Oujda, einum af 14 leikvöngum mögulegrar lokakeppni HM í Morokkó mynd/bbc
Umsókn Morokkó um að halda HM 2026 í fótbolta hefur staðist skoðun FIFA og mun keppa við umsókn Bandaríkjanna, Kanada og Mexíkó þrátt fyrir að teljast áhættusöm í þremur flokkum mats FIFA.

Umsóknin fékk 2,7 af 5 mögulegum í áhættumatsskoðunum FIFA á meðan sameiginlegt bið Norður-Ameríkuþjóðanna fékk 4 af 5. Hefði umsókn Morokkó fengið 2 eða lægri einkunn hefði henni verið hafnað.

Níu af þeim 14 leikvöngum sem eru í umsókninni eru enn óbyggðir og hinir fimm þurfa allir á endurbreytingum að halda til að standast kröfur FIFA. Þá eru aðeins tveir leikvanganna umkringdir fullnægjandi gistirímum og samgöngur til og frá leikvöngunum fengu einnig áhættusama einkunn.

FIFA fékk hins vegar tryggingu fyrir því frá stjórnvöldum Morokkó að fjöldi gistiríma í borgunum 12 verði orðinn fullnægjandi árið 2026.

Samkvæmt umsókn Morokkó mun uppbyggingin sem þarf fyrir HM kosta 12 milljarða punda en heimsmeistaramótið 2026 verður það fyrsta þar sem þáttökuþjóðir verða 48. Það ætti ekki að þurfa að ráðast í neina byggingarvinnu fyrir umsókn Bandaríkjanna, Kanada og Mexíkó.

Báðar umsóknir verða teknar fyrir á fundi 10. júní þar sem þær þurfa að fá samþykki áður en kosið verður á milli þeirra þann 13. júní. Þar munu allar 207 þjóðirnar sem eru hluti af FIFA kjósa um staðsetningu HM 2026.

Morokkó hefur fjórum sinnum áður sótt um að halda HM; 1994, 1998, 2006 og 2010, en aldrei orðið ágengt. HM hefur aðeins einu sinni verið haldið í Afríku, árið 2010 í Suður-Afríku.

Bandaríkin héldu keppnina árið 1994 og sóttu um mótið 2022 en biðu þar lægri hlut gegn Katar. Mexíkó hélt lokakeppni HM 1970 og 1986. HM hefur aldrei farið fram í Kanada.

HM í Rússlandi hefst eftir 12 daga, fimmtudaginn 14. júní, á leik Rússlands og Sádi-Arabíu. Ísland tekur þátt í lokakeppni HM í fyrsta skipti í sumar og er fyrsti leikur gegn Argentínu í Moskvu þann 16. júní.




Fleiri fréttir

Sjá meira


×