Fótbolti

Ætla að fagna sæti Íslands í sextán liða úrslitum í gamalli sígarettuverksmðju

Kolbeinn Tumi Daðason skrifar
Gamla sígarettuverksmiðjan er nú hin fallegasti gastropub þar sem Íslendingar ætla að hittast eftir leikinn gegn Króatíu í Rostov.
Gamla sígarettuverksmiðjan er nú hin fallegasti gastropub þar sem Íslendingar ætla að hittast eftir leikinn gegn Króatíu í Rostov.

Óðum styttist í að landsliðið okkar hefji keppni á heimsmeistaramótinu í fótbolta. Þótt óljóst sé hve margir stuðningsmenn Íslands mæta á leiki liðsins ytra má í það minnsta fullyrða að þeir verða í þúsundum talið.

Af því tilefni ætlar ferðaskrifstofan Tripical í samstarfi við Tólfuna að slá upp Íslendingapartý eftir leiki liðsins ytra. Þar er lofað öryggisgæslu í háklassa þar sem Íslendingar geta skemmt sér saman.

„Það verða partý í öllum borgunum. Íslensk þjóðhátíðarstemning og það verða góð verð á drykkjum,“ segir Tólfukempurnar Benjamín Hallbjörnsson og Sveinn Ásgeirsson. 

Neðst í fréttinni má finna upplýsingar um staðsetningu partýjanna þriggja en þau fara ýmist fram miðsvæðis í Moskvu (Uppselt), í sveitasal í Volgograd og í gamalli sígarettuverksmiðju í Rostov þegar sæti í sextán liða úrslitum HM verður vonandi í höfn.

Fram hefur komið að Sendiráð Íslands í Moskvu efnir til viðburðar nálægt Rauða torginu í Moskvu fyrir Argentínuleikinn en Tólfan sér um stuðið eftir leiki.

Frikki Dór og Jón Jónsson munu vafalítið gefa allt sem þeir eiga. vísir/stefán

Viðburður Tólfunnar og Tripical er nefndur „Risapartý“ og þar munu bræðurnir Frikki Dór og Jón Jónsson spila auk þess sem plötusnúðurinn Dóra Júlía mætir á svæðið.

„Þetta er í takti við að sleppa því að hella í sig fyrir leik,“ segja þeir Benni og Svenni. Þeir minna á „draugasöguna“ um að ölvun ógildi miðann. Engin ástæða sé til að taka áhættu hvað það varði.

„Mætum frekar snemma á leikinn, tökum þjóðsönginn, ég er kominn heim og stillum stúkurnar saman,“ segir Svenni. Það gefi leikmönnum byr undir báða vængi, að finna fyrir stuðningnum frá því þeir mæta sjálfir á leikvanginn, klæddir í jakkaföt og virða fyrir sér stóra sviðið.

Svo verði sungið og trallað á leiknum en síðan geti allir skellt sér saman í partý.

Birkir Bjarnason er örugglega velkomin í partýin en landsliðið flýgur aftur til Gelendzhik eftir leiki sína. Vísir/Vilhelm

„Partýin verða á stórum skemmtistöðum fyrir svona 500-1000 manns. Það er búið að bóka staðina og þar verður aukin gæsla. Þarna kemst fólk í öryggi og allir Íslendingarnir geta djammað á einum stað,“ segja þeir félagar.

Skemmtistaðirnir séu nálægt leikvöngunum í Volgograd og Rostov við Don. Í Moskvu sé skemmtistaðurinn nálægt Rauða torginu.

„Tólfan ætlar að mæta beint eftir leik og skemmta sér með þeim sem koma. Þetta hentar okkur vel enda fljúga Tólfur heim í hádeginu daginn eftir leik.“

Styrmir Elí Ingólfsson sendi Vísi eftirfarandi upplýsingar um staðsetningu á partýjunum.

Moskva: Zolotay Vobla (Golden Vobla) - veitingastaður og bar (rússneskur bar í rússneskum stíl)
Metro Prospekt Mira, Protopopovskiy Lane, 3.

Volgograd: Frant Hotel Palace - veislusalur (hálfgerður sveitasalur aðeins út fyrir kjarnann)
Ulitsa Imeni Zemlyachki, 40, Volgograd, Volgogradskaya oblast', Russia, 400048

Rostov-On-Don: Bukovski - veitingastaður og bar (smíðaður í gamalli sígarettuverksmiðju)

Gazetnyy Pereulok, 99, Rostov, Rostovskaya oblast', Russia, 344002

Nánari upplýsingar má finna á Facebook-viðburðunum fyrir partýin.

Partý í Moskvu
Partý í Volgograd
Partý í Rostov við Don



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira