Bílar

Nissan sker niður framleiðslu um 20% í Bandaríkjunum 

Finnur Thorlacius skrifar
Nissan Altima hefur selst illa undanfarið vestra.
Nissan Altima hefur selst illa undanfarið vestra.

Stórlækkaður hagnaðar Nissan á sölu bíla í Bandaríkjunum hefur leitt til þess að fyrirtækið hefur ákveðið að minnka framleiðslu bíla sinna þar um 20%.

Minnkandi sala bíla í Bandaríkjunum og sérlega hörð samkeppni sem lýsir sér einna helst í auknum afsláttum á bílum hefur leitt til verri afkomu Nissan á þessum næststærsta bílamarkaði heims.

Mun niðurskurðurinn eiga við í tveimur verksmiðjum Nissan í Bandaríkjunum og þremur í Mexíkó. Það mun þó ekki leiða til uppsagna starfsfólks í verksmiðjunum. Frá mars í fyrra og til mars í ár hefur sala Nissan bíla fallið um 9,2% í Bandaríkjunum, en nokkur aukning var á sölu árið 2016. Það er helst slök sala Nissan Altima bílsins sem skýrir út hina minnkandi sölu, en ný gerð hans verður kynnt seinna á þessu ári.

Fjárhagsár Nissan kláraðist í lok mars og hagnaður á sölu í Bandaríkjunum lækkaði um 30,5%. Nissan hefur ríflega tvöfaldað sölu bíla sinna í Bandarikjunum frá árinu 2010 og selur nú þar um 1,6 milljónir bíla á ári, en það er fast að 10% sölu allra bíla í landinu á ári. Um 60% allra seldra bíla Nissan í Bandaríkjunum eru framleiddir þar í landi eða í Mexíkó.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.