Viðskipti erlent

Hætt við milljarðaverkefni vegna sólarorkutolla Trump

Kjartan Kjartansson skrifar
Sólarorka hefur blómstrað í Bandaríkjunum undanfarin ár, ekki síst vegna ódýrra kínverskra sólarsellna. Verndartollar Trump eru taldir hægja á vextinum.
Sólarorka hefur blómstrað í Bandaríkjunum undanfarin ár, ekki síst vegna ódýrra kínverskra sólarsellna. Verndartollar Trump eru taldir hægja á vextinum. Vísir/EPA
Orkufyrirtæki í Bandaríkjunum hafa hætt við eða sett á ís fjárfestingar stórum sólarorkuverkefnum upp á meira en tvo og hálfan milljarð dollara eftir að Donald Trump forseti lagði á háa verndartollar á innfluttar sólarsellur. Fyrirtækin segja að hafi kostað þúsundir væntanlegra starfa.

Samkvæmt úttekt Reuters-fréttastofunnar eru fjárfestingarnar um tvöfalt meiri en þær sem framleiðendur bandarískra sólarsellna sem njóta góðs af verndartollunum ætla að ráðast í.

Trump tilkynnti um verndartollana í janúar þrátt fyrir mótmæli sólarorkuiðnaðarins í Bandaríkjunum. Honum hefur vaxið ásmegin undanfarin ár, meðal annars vegna verðfalls á innfluttum sólarsellum, frá Kína. Þannig hefur sólarorka orðið samkeppnishæf í verði við jarðgas og kol.

Sérfræðingar hafa spáð því að draga muni úr fjölgun sólarorkuvera á næstu tveimur árum vegna tollanna. Þeir nema 30% næstu fjögur árin en minnkar um 5% á ári eftir það. Sólarorkuiðnaðurinn segir að tollarnir auki kostnaðinn við stór sólarorkuver um 10%.

Um þrefalt fleiri Bandaríkjamenn starfa við sólarorku en í kolaiðnaðinum. Engu að síður hefur ríkisstjórn Trump gripið til ýmissa aðgerða til þess að hygla kolaorku á kostnað endurnýjanlegra orkugjafa. Nú síðast hafa komið fram hugmyndir um að stjórnvöld gætu skikkað dreififyrirtæki til að kaupa orku frá kolaorkuverum.

Ríkisstjórn Trump hefur jafnframt reynt að afnema loftslagsaðgerðir fyrri ríkisstjórnar Baracks Obama sem miðuðu að því að draga úr losun gróðurhúsalofttegunda sem valda loftslagsbreytingum frá orkuframleiðslu.


Tengdar fréttir






Fleiri fréttir

Sjá meira


×