Enski boltinn

Amazon keypti sýningarrétt á leikjum úr ensku úrvalsdeildinni

Óskar Ófeigur Jónsson skrifar
Gylfi Þór Sigurðsson fagnar marki með Everton.
Gylfi Þór Sigurðsson fagnar marki með Everton. Vísir/Getty
Amazon.com hefur tryggt sér sjónvarpsréttinn á tuttugu leikjum á tímabili úr ensku úrvalsdeildinni í fótbolta frá og með árinu 2019 en þetta eru sögulegar fréttir. Samningurinn er til þriggja ára.

Prime sjónvarpsþjónusta Amazon.com mun því bjóða áskrifendum sínum upp á leiki úr vinsælustu fótboltadeild í heimi. Þetta er sögulegt skref í Bretlandi en hingað til hafa stóru sjónvarpsstöðvarnar í Bretlandi eingöngu sýnt leiki úr ensku úrvalsdeildinni.





Amazon.com keypti enn af þremur pökkum ensku úrvalsdeildarinnar sem höfðu ekki gengið út en forráðamenn ensku úrvalsdeildarinnar greindu frá þessu í dag.

Sky og BT hafa þegar keypt pakka og eru flestir stærstu leikirnir áfram sýndir á Sky í Bretlandi. Sky sýnir 128 leiki á tímabili en BT 52 leiki.

Sky borgaði 3,58 milljarða punda fyrir þennan sjónvarpsrétt en BT keypti sinn rétt á 90 milljón pund. Það var ekki gefið upp í tilkynningu Amazon og ensku úrvalsdeildarinnar hversu mikið Amazon mun borga fyrir sinn rétt.

Þeir sem vilja á horfa á ensku úrvalsdeildina á Prime þurfa að kaupa áskrift hjá Amazon.com en það verða þó ekki allir leikir lokaðir.

Amazon.com mun meðal annars sýna leiki í miðri viku í desember auk leikja yfir jólahátíðina og ætlar fyrirtækið að bjóða þessa leiki frítt á miðli sínum einskonar jólagjöf til knattspyrnuáhugamanna.




Fleiri fréttir

Sjá meira


×