Innlent

Hvalárvirkjun ýmist sögð falleg eða hervirki gegn náttúrunni

Kristján Már Unnarsson skrifar
Eva Sigurbjörnsdóttir, oddviti Árneshrepps.
Eva Sigurbjörnsdóttir, oddviti Árneshrepps. Stöð 2/Egill Aðalsteinsson.
Hrafn Jökulsson kallar Hvalárvirkjun hervirki gegn náttúrunni sem aðeins erlendir auðkýfingar hagnist á. Oddviti Árneshrepps segir á hinn bóginn að þetta verði falleg virkjun sem komi öllum Vestfjörðum til góða. Ólík sjónarmið um virkjunina norður á Ströndum mátti heyra í frétt Stöðvar 2. 

Vegurinn norður í Árneshrepp er holóttur malarvegur og þar er enginn snjómokstur stóran hluta vetrar sem þýðir að íbúarnir lokast inni vikum saman. Bændur knýja rekaviðarsagir með dísilvélum en bættar samgöngur, ljósleiðari og þriggja fasa rafmagn eru meðal þeirra umbóta sem ráðamenn hreppsins segja fylgja Hvalárvirkjun.

Jarðstreng frá Hvalárvirkjun gæti fylgt nýr vegslóði yfir Ófeigsfjarðarheiði milli Ísafjarðardjúps og Árneshrepps sem skapar nýjan Vestfjarðahring um Strandir og Inndjúp.Grafík/Hlynur Magnússon.
Þannig varð lélegt rafmagn til þess að þriggja milljóna króna varmadæla eyðilagðist í Djúpuvík, að sögn oddvitans og hótelstjórans Evu Sigurbjörnsdóttur. Dælan hafi ekki þolað tíðar straumbreytingar. 

„Til þess að koma í veg fyrir að slíkt gerist, hvað eftir annað, að það eyðileggist hjá manni tæki, þá þurfum við betra rafmagn. Og við munum jafnframt fá betri samgöngur. 

Það vantar orku inn á alla Vestfirði þannig að við teljum að þetta sé okkur öllum til góða á Vestfjörðum, ekki bara hér. 

Nú svo er þetta náttúrlega langvistvænasta orka sem hægt er að fá, - í veröldinni,“ segir Eva.

Stöðvarhús Hvalárvirkjunar verður neðanjarðar. Inn á þessa mynd er búið að teikna aðkomubyggingu stöðvarhússins til hægri og fyrirhugaðan veg upp á heiðina.Mynd/Vesturverk.
Kosningaúrslitin í Árneshreppi gátu vart orðið skýrari. Fylgismenn Hvalárvirkjunar fengu öll fimm hreppsnefndarsætin, andstæðingar ekkert. Þeir halda samt baráttunni áfram og vekja athygli á náttúru svæðisins með myndum af fossum sem skerðast. 

„Það eru fleiri og fleiri að vakna til vitundar um hvursu mikið hervirki gegn náttúru Íslands þessi áform eru,“ segir Hrafn Jökulsson, rithöfundur í Norðurfirði. 

„Já, já, það eru margir sem segja það. En það eru líka mjög margir sem segja að þetta sé lítið spor í vistkerfi heimsins og ég er þeirrar skoðunar,“ segir Eva.

Hrafn Jökulsson, rithöfundur í Árneshreppi.Stöð 2/Egill Aðalsteinsson.
Hún segir virkjunarmannvirkin verða neðanjarðar. Á Ófeigsfjarðarheiði verða þó fimm stíflur sem mynda þrjú miðlunarlón. 

30 milljóna króna árleg fasteignagjöld af Hvalárvirkjun þýddi um 50 prósenta tekjuaukningu hreppsins. Það eru yfir tvær milljónir króna á hvert heimili í sveitinni. 

Þá sjá fylgismenn virkjunar tækifæri felast í bættum vegi um Ingólfsfjörð og Ófeigsfjörð og ekki síst vegslóða sem fylgdi jarðstreng yfir Ófeigsfjarðarheiði sem myndi opna hringleið um Djúp á sumrin.

Frá Ingólfsfirði. Búið er að teikna fyrirhugaðan veg frá Eyrarhálsi niður að Eyri inn á myndina.Mynd/Vesturverk.
„Ég held að þetta sé ekki lausnin, hvorki á byggðavandanum á Ströndum og þaðan af síður fyrir raforkuöryggi á Vestfjörðum. Ég held að þeir einu sem hagnist að lokum séu erlendir auðkýfingar. 

Og við eigum ekki að gefa þeim Ófeigsfjörð og eftirláta þeim hinar fallegu Strandir,“ segir Hrafn. 

„Það eru til fallegar virkjanir á Íslandi. Og þessi verður sko örugglega ekkert verri heldur en hinar,“ segir Eva. 

Hér má sjá frétt Stöðvar 2:


Tengdar fréttir




Fleiri fréttir

Sjá meira


×