Erlent

Óttaðist að umsjónarmaður Rússarannsóknar hefði hylmt yfir fyrir Trump

Kjartan Kjartansson skrifar
Starfandi aðstoðarforstjóri FBI hafði áhyggjur af því að Rod Rosenstein hefði hjálpað Trump að hylma yfir raunverulega ástæðu þess að hann rak James Comey í fyrra.
Starfandi aðstoðarforstjóri FBI hafði áhyggjur af því að Rod Rosenstein hefði hjálpað Trump að hylma yfir raunverulega ástæðu þess að hann rak James Comey í fyrra. Vísir/Getty
Fyrrverandi starfandi forstjóri bandarísku alríkislögreglunnar FBI hafði áhyggjur af því að aðstoðardómsmálaráðherra Bandaríkjanna hafi hjálpað Donald Trump forseta að búa til átyllu til að reka James Comey, fyrrverandi forstjóra FBI. Aðstoðarráðherrann hefur nú umsjón með Rússarannsókninni svonefndu.

Minnisblöð Andrew McCabe, fyrrverandi aðstoðarforstjóri FBI, sem New York Times hefur séð lýsa fundi sem hann átti með Rod Rosenstein, aðstoðardómsmálaráðherra, nokkrum dögum eftir að Trump rak Comey í maí í fyrra. McCabe var þá tekinn við sem sem starfandi forstjóri stofnunarinnar.

Brottrekstur Comey er hluti af rannsókn Roberts Mueller, sérstaks rannsakanda dómsmálaráðuneytisins, á því hvort að Trump hafi reynt að hindra framgang réttvísinnar.

Rosenstein skrifaði minnisblað sem var í fyrstu notað sem opinber rökstuðningur ríkisstjórnar Trump fyrir brottrekstri Comey. Í minnisblaðinu gagnrýndi Rosenstein meðferð Comey á rannsókn á Hillary Clinton, mótframbjóðanda Trump.

Í samtali við McCabe í dómsmálaráðuneytinu sagði Rosenstein hins vegar að Trump hafi upphaflega beðið hann um að vísa til Rússarannsóknarinnar í minnisblaði sínu. Rosenstein hafi hins vegar ekki getið þess hvað forsetinn hafi viljað að hann segði nákvæmlega.

New York Times segir að McCabe hafi skilið orð Rosenstein sem vísbendingu um að brottrekstur Comey hafi í raun tengst Rússarannsókn FBI. Rosenstein hafi þannig hjálpað Trump að hylma yfir þá staðreynd með því að skrifa minnisblaðið þar sem vísað var til hvernig hann fór með rannsóknina á Clinton.

Rosenstein hefur sagst stíga til hliðar ef til þess kæmi

Aðrar heimildir blaðsins herma að Trump hafi aðeins viljað að Rosenstein léti þess getið að forsetinn væri ekki sjálfur til rannsóknar. Rosenstein hafi hins vegar ekki talið það nauðsynlegt. Í bréfi sem Trump skrifaði Comey við brottreksturinn þakkaði forsetinn honum fyrir að hafa sagt sér í þrígang að hann væri ekki til rannsóknar.

Í sjónvarpsviðtali skömmu seinna viðurkenndi Trump einnig að hann hafi haft Rússarannsóknina í huga þegar hann rak Comey.

Staða Rosenstein þykir snúin. Það féll í hans skaut að hafa umsjón með Rússarannsókninni eftir að Jeff Sessions, dómsmálaráðherra, lýsti sig vanhæfan til að fjalla um hana í mars í fyrra. Það var því Rosenstein sem skipaði Mueller sérstakan rannsakanda eftir að Trump rak Comey.

Á sama tíma var það hins vegar minnisblaðið sem Rosenstein skrifaði sem Trump notaði til að réttlæta brottreksturinn á Comey. Lögmenn Trump hafa vísað til þess minnisblaðs sem sönnun þess að forsetinn hafi ekki reynt að hindra framgang rannsóknarinnar.

Þannig gætu gjörðir Rosenstein sjálfs hæglega komið til rannsóknar hjá saksóknarateymi Mueller. Rosenstein sagði AP-fréttastofunni í fyrra að hann hefði rætt við Mueller um þann möguleika. Reyndist eitthvað sem hann gerði skipta máli fyrir rannsóknina myndi hann draga sig í hlé.

Andrew McCabe, fyrrverandi aðstoðarforstjóri bandarísku alríkislögreglunnar, var rekinn rétt áður en hann ætlaði sjálfur að hætta í vor. Hann segir brottreksturinn hafa átt sér pólitískar ástæður.Vísir/AFP

Hefur ráðist að bæði Rosenstein og McCabe

Trump hefur ítrekað ráðist að Rosenstein opinberlega og á bak við luktar dyr undanfarna mánuði. Forsetinn er meðal annars sagður hafa íhugað að reka aðstoðardómsmálaráðherrann.

Talið er að Rosenstein sé umhugað um að verja Rússarannsóknina fyrir pólitískum afskiptum. Engu síður vakti ákvörðun hans um að veita repúblikönum aðgang að viðkvæmum gögnum um rannsóknina í síðustu viku áhyggjur.

Eftir mikinn þrýsting frá Trump og bandamönnum varðandi meintar pólitískar njósnir sem áttu að hafa farið fram um framboð hans lét Rosenstein einnig undan og lofaði að láta innri eftirlitsmann dómsmálaráðuneytisins kanna hvort að eitthvað væri hæft í ásökunum. Engin gögn hafa komið fram sem styðja að FBI og ráðuneytið hafi láti njósna um framboðið.

McCabe hefur svo lengi verið þyrnir í augum Trump forseta. Á meðan hann gegndi enn stjórnunarstöðu hjá FBI réðst Trump ítrekað að McCabe í ræðu og riti.

Forsetinn gerði þannig að því skóna að McCabe hefði tekið mildilega á Hillary Clinton þegar tölvupóstnotkun hennar sem utanríkisráðherra voru til rannsóknar hjá FBI vegna þess að eiginkona hans hefði þegið framlög frá hópi sem tengist nánum vini Clinton þegar hún bauð sig fram til ríkisþings Virginíu árið 2015. McCabe var ekki aðstoðarforstjóri FBI á þeim tíma.

Trump kom því svo til leiðar að McCabe yrði rekinn rúmum sólahring áður en hann hefði átt rétt á auknum lífeyrisréttindum í vor. Ástæðan var sú að innri eftirlitsmaður FBI hafði talið að McCabe hefði ekk greint rétt frá ákvörðun um að heimila fulltrúum FBI að ræða við fjölmiðla um rannsóknina á Clinton.

McCabe þrætir fyrir þær ásakanir og segir brottrekstur sinn hafa átt sér pólitískar ástæður. Tilgangurinn hafi verið að draga úr trúverðugleika hans sem vitni í Rússarannsókninni.


Tengdar fréttir

Funda um uppljóstrara með leiðtogum Repúblikana í dag

Leiðtogar Repúblikana funda með toppum eftirlits- og löggæslustofnana og fá leyniskjöl um uppljóstrara alríkislögreglu í forsetaframboði Trumps. Forseti segir alríkislögreglu hafa njósnað um sig í pólitískum tilgangi, áður en Rússamálið kom upp, en sú staðhæfing er umdeild og The New York Times fullyrðir að hún sé röng.

Trump og bandamenn magna upp „njósnahneyksli“

Ekkert hefur komið fram sem bendir til þess að FBI hafi njósnað óeðlilega um framboð Donalds Trump. Vangaveltur um slíkt hafa gengið fjöllum hærra í fjölmiðlum sem eru hallir undir forsetann.




Fleiri fréttir

Sjá meira


×