Erlent

Skrifa andlát transkonu á Bandaríkjastjórn

Stefán Ó. Jónsson skrifar
Roxana Hernandez lést um 2 vikum eftir komuna til Bandaríkjanna.
Roxana Hernandez lést um 2 vikum eftir komuna til Bandaríkjanna. DIVERSIDAD SIN FRONTERAS

Mannréttindasamtök saka bandarísk stjórnvöld um að hafa myrt hælisleitandann Roxana Hernandez, sem lést í haldi þarlendu útlendingastofnunarinnar.

Hernandez hafði komið til Bandaríkjann frá Hondúras, þar sem hún er sögð hafa verið ofsótt vegna stöðu sinnar sem transkona. Eftir að til Bandaríkjanna var komið handtóku yfirvöld innflyjendamála Hernandez vegna glæpa sem hún hafði framið í Texas-ríki; svosem smáþjófnað, að hafa stundað vændi og að koma ólöglega til landsins.

Hernandez, sem var smituð af HIV, veiktist hins vegar í haldi yfirvalda og lést skömmu síðar. Hún er fimmti einstaklingurinn sem lætur lífið í haldi bandarísku útlendingastofnunarinnar á síðastliðnum átta mánuðum.

Hópur mannréttindasamtaka sendi frá sér yfirlýsingu vegna andláts hennar. Þar kemur meðal annars fram að Hernandez hafi eygt von í Bandaríkjunum, þar sem hún hafði hugsað sér að hefja nýtt líf - „frjáls undan oki misnotkunar, áhættu og hótana,“ eins og það er orðað á vef breska ríkisútvarpsins.

Þau segja að andlát Hernandez skrifist á skeytingarleysi stjórnvalda. Aðeins tvær vikur liðu frá því að hún var handtekinn þangað til að hún lést. Átta dögum eftir komuna til Bandaríkjanna, tveimur dögum eftir að hún hafði verið handtekin, var Hernandez flutt á sjúkrahús vegna einkenna sem minntu á lungnabólgu, ofþornun og aðra kvilla sem oft eru fylgifiskar HIV-smits. Hún lést svo að morgni 25. maí, á sjúkrahúsi í Albuquerque í Nýju-Mexíkó.

Mannréttindasamtökin segja að þrátt fyrir að bandarísk stjórnvöld hafi komið Hernandez undir læknishendur sé blóð hennar á þeirra höndum. „Með öðrum orðum, hún var myrt,“ segir í yfirlýsingu Pueblo Sin Fronteras, Al Otro Lado og Diversidad Sin Fronteras.

Talið er að í hópi þeirra 267 einstaklinga sem fylgdu Hernandez til Bandaríkjanna, til að sækja um hæli í Kaliforníu, hafi verið 23 trans-einstaklingar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.