Skoðun

Þegar brestur og brotnar - verður úr að bæta

Edith Alvarsdóttir skrifar
Borgin okkar - Reykjavík býður fram kraftmikla reynslu, áræðni og þor í komandi borgarstjórnarkosningum, vegna þess sem Reykvíkingar finna, þegar á þeim er brotið í skólakerfi, þar sem mörgum líður illa.

Skóli án aðgreininga gerir ráð fyrir því að öll börn eigi að njóta sömu þjónustu og kennslu. Þar er ekki tekið tillit til hversu mismunandi börnin eru, þegar kemur að námshæfni, getu og félagsþroska.

Foreldrar barna með námserfiðleika telja margir að börn þeirra njóti ekki sömu tækifæra og börn sem betur gengur í námi. Börn sem þurfa á sérkennslu að halda eru oft og iðulega tekin út úr tímum í þeim fögum sem þeim gengur vel í, og sett í  sérkennsluna. Þetta orsakar að börnin geta ekki nýtt styrkleika sína og upplifa sig ekki þess verð að hafa hæfileika og getu í neinu. Þetta leiðir oftar en ekki til lágs sjálfsmats og hegðunarvanda.

Við sækjumst öll eftir samveru og vináttu við fólk sem við getum samsamað okkur með. Í skóla án aðgreiningar verður erfiðara að finna til þessarar samsömunar vegna þess hve ólíkir nemendurnir eru. Félagslegur vanþroski getur leitt til þess að börn verði útundan, nái ekki að mynda tengsl við jafnaldra sem eru á öðru þroskastigi. Þetta leiðir oft til einangrunar, lélegrar sjálfsmyndar og erfiðleika að spjara sig innan hópsins. 

Flest börn með greiningar hvort heldur er hegðunar- eða námslega, fá með sér ákveðið fjármagn sem skólarnir fá. Hvert fara þessir fjármunir? Fylgja þeir nemendunum og eru þeir þeim eyrnamerktir? Eru gerðar kröfur um árangur í sérkennslunni?

Börn með afburða námsgetu verða útundan þar sem mikill tími kennara fer í að sinna börnum með sérþarfir. Þetta getur valdið námsleiða og óþoli gagnvart þeim nemendum sem þurfa meiri athygli. Í ljósi þessa er niðurstaða PISA-könnunarinnar frá 2016 að staða íslenskra nemenda hefur aldrei verið lakari í öllum greinum PISA-könnunarinnar. 

Mikilvægt er að fá allar upplýsingar varðandi grunnskólann og árangur þeirrar stefnu sem rekin hefur verið. Áður en menn gefa sér að hækkun launa til kennarastéttarinnar lagi allan vanda. Annað er óábyrgt.

Börnin eru framtíðin, leyfum sérhverju þeirra að ná árangri á þeirra forsendum og getu. Nýtum mannauðinn sem í þeim býr.

Höfundur skipar 2. sætið á framboðslista Borgin okkar Reykjavík fyrir komandi sveitarstjórnarkosningar.  




Skoðun

Skoðun

Sigur­bogi

Dagbjört Ósk Steindórsdóttir skrifar

Sjá meira


×