Skoðun

Hestamannafélagið Sprettur

Jakobína Agnes Valsdóttir skrifar
Hestamannafélagið Sprettur er öflug heild, félag sem varð til þegar hestamannafélögin Gustur í Kópavogi og Andvari í Garðabæ sameinuðust árið 2012. Úr varð eitt stærsta hestamannafélag landsins með 1.650 félagsmenn með aðstöðu á Kjóavöllum.

Á Kjóavöllum er fólk í góðum tengslum við náttúruna á stóru landsvæði þar sem stærsta reiðhöll landsins er staðsett en hún er 4.000 fm2 að stærð. Stefnt er að stækkun reiðhallarinnar þannig að upphitunarsvæði verði til staðar, sem hægt verður að nýta undir reiðkennslu og fyrir hinn almennan reiðmann til þess að æfa sig og hestinn. Eins verði þar aðstaða fyrir barna- og unglingastarf.

Mynd/Hestamannafélagið Sprettur
Hestamennska er vaxandi grein bæði sem íþrótta-, tómstunda- og atvinnugrein, því er dýrmætt fyrir hestaiðkenndur að eiga svo öflugt félag eins og Sprett. Á Sprettssvæðinu vantar verulega uppá frágang frá Kópavogsbæ sem bæði varðar félagsmenn sem og nágranna svæðisins. Mikið vatn flæðir að höllinni og niður á aðalvöllinn eins og meðfylgjandi mynd frá því í mars sýnir og þegar frystir myndast ísing. Þetta er stórhættulegt fyrir börn sem fara út á ísinn og eiga það á hættu að ísinn gefi sig þannig að þau falli ofan í vatnið. Ekkert hefur verið gert til þess að koma í veg fyrir þessa slysagildru. Þetta er óásættanlegt og þarfnast úrbótar strax. Einnig þarf að bæta samgöngur þannig að börn og unglingar geti tekið strætó á svæðið. Lýsing í hesthúsabyggðinni er einnig ábótavant og getur skapast hætta fyrir ríðandi og gangandi fólk.

Miðflokkurinn í Kópavogi ætlar að þrýsta á uppbyggingu framhaldsskóla í efri byggðum Kópavogs þar sem iðn-, tækni- og íþróttabrautir verði í boði, því er tilvalið að nýta aðstöðuna í Spretti fyrir hestabraut. Hestamennskan er íþrótt sem hefur mikið forvarnargildi líkt og aðrar íþróttir, einnig hentar hún bæði ungum sem öldnum þar sem allir í fjölskyldunni geta tekið þátt. Öll börn og unglingar ættu að eiga möguleika á að stunda hestamennsku og komast í kynni við hestinn óháð efnahag. Einnig er mikilvægt að börn með skerðingar fái sömu tækifæri. Miðflokkurinn í Kópavogi vill hlúa betur að öllum fyrrnefndum þáttum í samstarfi við Sprett.

Sprettur hefur alla burði til þess að verða eitt glæsilegasta hestamannafélag landsins með öflugasta barna- og unglingastarfið sem getur boðið upp á fjölbreytta dagskrá innan- sem utanhúss. Þar fer fram reiðkennsla, sýningar, tamningar og útreiðar allann ársins hring. Miðflokkurinn í Kópavogi vill styðja við hestamannafélagið Sprett í uppbyggingu og rekstri til þess að standa vel að landsmóti sem fyrirhugað er á svæðinu árið 2022, en von er á tíu til tuttugu þúsund gestum. Töluverð vinna er eftir í undirbúning og að mörgu þarf að huga, einnig svo að svæðið uppfylli væntingar félagsmanna og nágranna félagsins til framtíðar. Við stefnum á glæsilegt og eftirminnilegt landsmót sem Sprettarar og Kópavogsbúar geta verið stoltir af.

Höfundur skipar 2. sæti á framboðslista Miðflokksins í Kópavogi.




Skoðun

Skoðun

Er þetta eðli­legt?

Guðrún Árnadóttir,Guðrún Tara Sveinsdóttir,Hekla Kollmar,Þorgerður Jörundsdóttir skrifar

Sjá meira


×