Viðskipti innlent

Bjórinn á rúmlega hundrað kall í Costco

Kolbeinn Tumi Daðason skrifar
Bjórinn í Costco í gær á töluvert lægra verði en venjulega, eins og sést á myndinni.
Bjórinn í Costco í gær á töluvert lægra verði en venjulega, eins og sést á myndinni. Vísir
Kassi af Bud Light bjór, tuttugu 330 mL flöskur, kostar 2163 krónur í Costco í dag. Verðið stendur til boða til 4. júní. Þá kostar lítill kassi af Corona Extra bjór, tólf 330 mL flöskur, 1373 krónur. Með virðisauka kosta kassarnir 2401 krónu og 1524 krónur.

Kaupandi bjórs hjá Costco í gær lét Vísi vita af afslættinum sem í boði væri hjá Costco. Aðeins þeir sem eru með vínveitingaleyfi geta keypt áfengi hjá bandaríska smásölurisanum í Kauptúni. Honum kom á óvart að áfengið var á afslætti en hann hafði ekki upplifað það áður hér á landi.
Corona bjórinn rennur út í júní.

Bjór að renna út

Eins og sjá má á myndunum er afslátturinn töluverður. Í prósentum er afslátturinn af Bud light kassanum 34% en Corona Extra kassanum 45%.

Talað er um Augnabliks sparnað á skiltunum í Costco.

Sé bjórinn reiknaður í stykkjatali kostar Bud light flaskann 108 krónur og Corona bjórinn 115 krónur, 120 krónur og 127 krónur með virðisaukaskatti.

Svo virðist sem bjórinn sem er seldur á afslætti renni út á næstu mánuðum. Bud Light bjórinn rennur út í júlí og Corona bjórinn í júní samkvæmt merkingum á pakkanum.

Vísir hafði samband við Brett Vigelskas, framkvæmdastjóra Costco á Íslandi, og spurði hann út í bjórsöluna hjá Costco.

Á þeim tíma hafði fréttastofa aðeins haft veður af afslættinum en ekki haft myndirnar því til staðfestingar.

Brett þvertók fyrir að um nokkra afsláttarsölu væri að ræða á bjór í Costco. 
Bud light bjórinn þarf að drekka í síðasta lagi í júlí miðað við upplýsingarnar á pakkanum.

Skrýtinn orðrómur

„Nei, það er ekki rétt,“ sagði Brett.

Okkur skilst að um sé að ræða Bud light bjór og Corona bjór. Að það tengist tollafgreiðslu vörunnar sem hafi dregist á langinn, og því sé hann seldur ódýrt?

„Nei, því miður. Ég veit ekkert um hvað þú ert að tala.“

Aðspurður sagðist Brett vera staddur í Kauptúni í Garðabæ, í versluninni, en sagði ekkert óvenjulegt vera í gangi varðandi áfengissölu. 

„Nei, þetta er bara einhver skrýtinn orðrómur.“

Í framhaldinu bárust Vísi myndirnar sem fylgja fréttinni sem teknar voru í Costco í gær.

Ekki náðist í Brett til að bera myndirnar undir hann, hvorki síðdegis í gær né í dag.





Fleiri fréttir

Sjá meira


×