Innlent

Hvaða meirihlutar eru mögulegir í borginni?

Kristín Ólafsdóttir skrifar
Hluti oddvitanna í borginni samankomnir á kosningavöku í gær.
Hluti oddvitanna í borginni samankomnir á kosningavöku í gær. Vísir/Vilhelm
Ljóst er að breytingar verða á meirihlutasamstarfi í höfuðborginni í kjölfar nýafstaðinna kosninga. Meirihluti Samfylkingar, Vinstri grænna, Pírata og Bjartrar framtíðar féll í kosningunum í gær og Sjálfstæðisflokkurinn er orðinn stærstur í borginni.

En hvaða meirihlutar eru nú mögulegir? 23 borgarfulltrúar voru kosnir í borgarstjórn í gær og því þarf a.m.k. 12 fulltrúa til að mynda meirihluta. Sjálfstæðisflokkur er stærstur með 8, Samfylkingin er næst með 7, Viðreisn og Píratar eru með 2 hvor og þá eru Miðflokkurinn, Vinstri græn, Sósíalistaflokkurinn og Flokkur fólksins allir með einn.

Nokkrir flokkar hafa nú þegar útilokað samstarf við Sjálfstæðisflokkin þar á meðal Dagur B. Eggertsson, borgarstjóri og oddviti Samfylkingarinnar, og Sanna Magdalena Mörtudóttir, oddviti Sósíalistaflokksins, að því er fram kom í frétt Mbl frá því í dag. Þá hefur Dóra Björt Guðjónsdóttir, oddviti Pírata, einnig útilokað samstarf við Sjálfstæðisflokkinn og því detta allir meirihlutar þessara flokka út af borðinu.

Eins og áður hefur komið fram er Viðreisn í lykilstöðu þar eð flokkurinn gæti myndað meirihluta til bæði vinstri og hægri. Þá sagði Þórdís Lóa Þórhallsdóttir, oddviti Viðreisnar, í hádegisfréttum Stöðvar 2 í dag að flokkurinn útilokaði ekki samstarf við neinn.

Þórdís Lóa segir að meirihlutaþreifingar hefjist strax í dag.Vísir/Margrét Helga
Ef miðað er við fjögurra flokka meirihluta, og þannig minnsta mögulega meirihluta í fulltrúum talið, standa því tiltölulega fáir möguleikar eftir – en glöggir sjá að Viðreisn á aðild að þeim öllum:

CDFM: Viðreisn, Sjálfstæðisflokkur, Flokkur fólksins, Miðflokkurinn

CDFV: Viðreisn, Sjálfstæðisflokkur, Flokkur fólksins, Vinstri græn

CDMV: Viðreisn, Sjálfstæðisflokkur, Miðflokkur, Vinstri græn

CFPS: Viðreisn, Flokkur fólksins, Píratar, Samfylkingin

CJPS: Viðreisn, Sósíalistaflokkurinn, Píratar, Samfylkingin

CMPS: Viðreisn, Miðflokkurinn, Píratar, Samfylkingin

CPSV: Viðreisn, Píratar, Samfylkingin, Vinstri græn

Þá gæti einhverjum hugnast að mynda meirihluta með fleiri en fjórum flokkum og þar kæmu eins-manns-flokkarnir, Sósíalistar, Vinstri græn, Flokkur fólksins og Miðflokkurinn, líklega sterkir inn. Nú verður því forvitnilegt að sjá hvernig flokkarnir semja en ljóst er boltinn er hjá Lóu og Pawel í Viðreisn.


Tengdar fréttir

Lokatölur í Reykjavík: Meirihlutinn er fallinn

Sjálfstæðisflokkurinn er stærsti flokkurinn í Reykjavík með átta fulltrúa af tuttugu og þremur. Samfylkingin er næststærst með sjö og Viðreisn fær tvo fulltrúa.




Fleiri fréttir

Sjá meira


×