Leikjavísir

Væntanlegur stórleikur talinn gerast á Íslandi

Samúel Karl Ólason skrifar
Þetta landslag svipar óneitanlega til Íslands.
Þetta landslag svipar óneitanlega til Íslands.
Aðdáendur tölvuleikjaframleiðandans Hideo Kajima telja að næsti leikur hans, Death Stranding, muni gerast á Íslandi. Kenning þessi leit dagsins ljós í kjölfar þess að Kojima birti mynd af tölvuteiknuðum mosa á Twitter og vísaði hann til tölvuleikjaráðstefnunnar E3 sem fer fram í Los Angeles í næsta mánuði.

Svo virðist sem að frekari upplýsingar um leikinn, sem margir bíða eftir með mikilli eftirvæntingu, verði gefnar út þá. Enn sem komið er er þó lítið sem ekkert vitað um Death Stranding og því var mosamyndin greind í þaula.

Hér má sjá tíst Kojima.

Einn þeirra sem grandskoðaði myndina birti á Twitter mynd Kojima og samhliða henni mynd af íslenskum mosa yfir hrauni.

Óhætt er að segja að líkindi séu með myndunum og það sem meira er, þá endurtísti Kojima samanburðinum.

Fleiri hafa gripið til þess að bendla Death Stranding við Ísland og annar notandi Twitter tók sig til og bar saman útlit úr stiklu leiksins við mynd frá Íslandi.

Ofan á þessar vísbendingar er bent á á vef GameRant að þegar Kojima vann að leiknum Metal Gear Solid 5: Phantom Pain ferðaðist hann til Íslands til að skoða sig um landið og árið 2014 birti hann mynd af íslenskum mosa á Twitter.

Þetta eru ekki einu vísbendingarnar því að í júní 2016 var birt stutt myndband þar sem framleiðsla Death Stranding var tilkynnt. Þar má sjá leikarann Norman Reedus vakna á svartri strönd og horfa út yfir hafið. Landslag þess myndbands lítur einnig út fyrir að vera gert með tilliti til Íslands.

Eins og áður segir er lítið sem ekkert vitað um Death Stranding, hvað leikurinn mun fjalla um og hvar honum er ætlað að gerast. Það má þó leiða líkur að því að umhverfi leiksins verði gert með Ísland í huga. Þó leikurinn muni ef til vill ekki gerast hér á landi.

Frekari upplýsingar munu þó líklegast líta dagsins ljós í næsta mánuði og er meðal annars von á nýrri stiklu sem frumsýnd verður á E3.






Fleiri fréttir

Sjá meira


×