Innlent

4500 manns ritað nafn sitt á undirskriftalista gegn þátttöku Íslands í Eurovision

Sunna Kristín Hilmarsdóttir skrifar
Söngkonan Netta fór með sigur af hólmi í Eurovision á laugardaginn. Keppnin fer fram í heimalandi hennar, Ísrael, á næsta ári.
Söngkonan Netta fór með sigur af hólmi í Eurovision á laugardaginn. Keppnin fer fram í heimalandi hennar, Ísrael, á næsta ári. vísir/ap

Tæplega 4500 manns hafa ritað nafn sitt á undirskriftalista sem stofnað var til á netinu um helgina þar sem hvatt er til þess að Íslendingar afþakki þátttöku í Eurovision að ári en keppnin fer þá fram í Ísrael.

Á síðu undirskriftalistans segir að „í ljósi mannréttindabrota Ísraelsríkis gagnvart palestínsku þjóðinni er ekki siðferðilega verjandi að taka þátt í glanskeppni eins og Eurovision í skugga þess ofbeldis sem Ísrael beitir nágranna sína. Ísraelsríki hefur á undanförnum mánuðum myrt tugi einstaklinga fyrir það eitt að mótmæla ástandinu.“

Stendur ekki annað til en að taka þátt í Ísrael

Eins og Vísir fjallaði um á sunnudag eru ýmsir ósáttir við sigur Ísraels í söngvakeppninni og vilja meina að ekki sé hægt að aðskilja hann frá pólitíkinni fyrir botni Miðjarðarhafs.

Þannig sagði Sveinn Rúnar Hauksson, fyrrverandi formaður félgsins Ísland-Palestína, í samtali við Vísi að sigur Ísraels væri hluti af ímyndarherferð Ísraels. Þá sagði hann jafnframt að Eurovision-keppnin sem haldin yrði þar að ári liðnu væri hluti af atlögu gegn Palestínumönnum.

Undirskriftalistanum er beint að RÚV sem sér um þátttöku Íslands í Eurovision. Eins og staðan er núna mun Ísland taka þátt í Ísrael að ári en bæði Felix Bergsson, fararstjóri íslenkska hópsins, og Skarphéðinn Guðmundsson, dagskrárstjóri RÚV, hafa báðir sagt í fjölmiðlum síðustu daga að ekki standi annað til af hálfu Íslands en að taka þátt.

Einn þeirra fjölmörgu sem slösuðust í mótmælunum á Gaza í gær. vísir/ap

Tala látinna komin upp í sextíu

Málefni Ísraels og Palestínu hafa verið mikið í fréttum í gær og í dag vegna mikilla mótmæla Palestínumanna á Gaza-ströndinni þar sem Ísraelsher skaut sextíu mótmælendur til bana og særði um 2700 manns að sögn palestínskra embættismanna.

Mótmæli Palestínumanna í gær voru vegna opnunar bandaríska sendiráðsins í Jerúsalem og viðurkenningu Bandaríkjanna á borginni sem höfuðborg Ísraels. Þessi ákvörðun Donalds Trump, Bandaríkjaforseta, er afar umdeild þar sem bæði Ísraelar og Palestínumenn gera tilkall til Jerúsalem sem höfuðborg.

Dagurinn í dag markar síðan sjötíu ára afmæli þess sem Palestínumenn kalla Nakba, eða Hörmunganna, þegar hundruð þúsunda Palestínumanna voru hraktir frá heimilum sínum í Palestínu við stofnun Ísraelsríkis árið 1948.


Samstöðufundur á Austurvelli

Í tilefni dagsins verður samstaða með Palestínu á Austurvelli í dag klukkan 17. Þar segir að Palestínumenn á Gaza, Vesturbakkanum, Austur-Jerúsalem og um allan heim muni safnast saman í dag til að minnast Nakba en krafa dagsins er réttur flóttafólks til heimkomu.

„Samstöðuhreyfingin með Palestínu um heim allan mun þennan dag styðja kröfu dagsins og rétt Palestínumanna til að lifa við mannréttindi og frið í sínu landi.

Stutt ávörp flytja Salmann Tamimi, Sema Erla Serdar og Ögmundur Jónasson,“ segir í tilkynningu vegna fundarins.


Tengdar fréttir

Netta sökuð um menningarnám

Menningarnám er þegar hópar í yfirburðastöðu stela menningu þeirra sem eru í minnihluta sér til hagsbóta.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.