Lífið

Valdimar og Sigurborg hafa farið í eina óvissuferð í mánuði 28 sinnum í röð

Stefán Árni Pálsson skrifar
Einstaklega skemmtileg hefð.
Einstaklega skemmtileg hefð.

Valdimar Víðisson og Sigurborg Geirdal settu sér það markmið fyrir þremur árum að standa fyrir einni óvissuferð í mánuði og hafa staðið við það allar götur síðan.

Síðan þá hafa þau prófað ótal nýja hluti saman. Hjónin hafa undanfarin ár farið rækilega út fyrir þægindarammann einu sinni í mánuði með því að gera eitthvað saman sem þau hafa ekki gert áður.

Þau skipta með sér mánuðum og halda því eina óvissuferð í mánuði. Uppátækið byrjaði sem áramótaheit sem hefur undið upp á sig.

„Við fáum bara hvort sinn mánuð. Hann byrjaði og tók janúar og svo tók ég febrúar. Við bara plönum eitthvað sem við höfum ekki gert áður. Það hefur alltaf verið skemmtilegt, en samt misskemmtilegt,“ segir Sigurborg Geirdal í þættinum Ísland í dag sem var á dagskrá Stöðvar 2 í gærkvöldi.

Eins og staðan er hafa þau farið saman í 28 óvissuferðir.

Einu sinni fóru þau saman í limmó í 80´s fatnaði.

„Þetta er allt frá því að fara í bingó í Vinabæ, Adrenalíngarðinn, froðudiskó,“ segir Valdimar en eina skilyrðið er að þau hafi aldrei gert þetta saman.

„Við erum kannski að plana fjóra til átta mánuði fram í tímann og síðan er það bara að plana og fara á netið og finna tíma. Síðan látum við alltaf hinn aðilann vita með góðum fyrirvara svo hægt sé að skipuleggja sig. Þetta er allt frá því að vera eitthvað flipp yfir í eitthvað sem tekur á.“

Einu skilaboðin sem þau fá er bara hvernig þau eiga að vera klædd hverju sinni.

„Eins og á morgun er ég með 28. óvissuferðina okkar og hann veit bara að hann á að vera tilbúin klukkan átta um kvöld og á að vera snyrtilega klæddur, og svo veit hann ekki meir,“ segir Sigurborg.

Hér að neðan má sjá innslagið um þau hjón frá því í gærkvöldi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.