Veiði

Heimildarmynd um afleiðingar sjókvíaeldis

Karl Lúðvíksson skrifar

Sjókvíaeldi á laxi er mjög umdeilt um allan heim og hafa afleiðingar þess fyrir umhverfið verið að koma greinilega í ljós á síðustu árum.

Þetta er eitt af hitamálunum á Íslandi í dag þar sem fyrirhugað eldi á norskum eldislaxi í sjókvíum á vestfjörðum virðist vera enn eitt mengunarsporið sem eigendur fyrirtækjana, sem eru norsk fyrirtæki, ætla að skilja eftir sig.  Mörg sjónarmið hafa komið fram bæði frá talsmönnum eldisfyrirtækjana sem og þeim sem standa á móti sjókvíaeldi af þeirra stærðargráðu sem hefur verið rætt.

Þorsteinn J. Vilhjálmsson hefur unnið heimildarmynd sem heitir "Undir yfirborðinu" þar sem m.a. er farið yfir þann skaða sem kvíaeldi hefur valdið í öðrum löndum.  Í myndinni er skoðuð reynsla annara þjóða þegar kemur að sjókvíaeldi á laxi, viðtöl í Skotlandi, Noregi, Svíþjóð, Bandaríkjunum og á Íslandi. Allstaðar hafa sömu vandamál komið upp, tengd mengun frá sjókvíunum sjálfum og erfðablöndun við villta laxastofna þegar eldislaxinn sleppur.

,,Þetta er eitt stærsta umhverfismál á Íslandi hin síðari ár og snýr að verndun auðlinda, fjarðanna og villtu laxastofnanna. Það er ekki nokkur maður á móti laxeldi, frekar en hefðbundnum sjávarútvegi eða landbúnaði, málið snýst um aðferðirnar.’’  sagði Þorsteinn í samtali við Veiðivísi.  ,,Ég held að það sé mikilvægt fyrir okkur að sjá þetta mál í stærra samhengi en semur nemur einhverjum deilum milli landsbyggðar og höfuðborgar á Íslandi. Við höfum tækifæri á að læra af reynslu annara þjóða og myndin útskýrir vel hvers vegna sjókvíaeldi á laxi er svona skaðlegt fyrir íslenska náttúru." 

Myndin er sýnd á sunnudaginn á RUV, kl. 20.15 og stikluna má sjá hér fyrir neðan. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira