Viðskipti erlent

Kolefnisfótspor ferðamennsku fjórfalt stærra en talið var

Kjartan Kjartansson skrifar
Mat á losun gróðurhúsalofttegunda vegna ferðamennsku hefur litið fram hjá neyslu ferðamanna fram að þessu.
Mat á losun gróðurhúsalofttegunda vegna ferðamennsku hefur litið fram hjá neyslu ferðamanna fram að þessu. Vísir/Ernir
Losun gróðurhúsalofttegunda sem valda loftslagsbreytingum sem hlýst af ferðamennsku er allt að fjórfalt meiri en áður hefur verið talið. Samkvæmt niðurstöðum nýrrar rannsóknar eru um 8% af heildarlosun manna tilkomin vegna ferðalaga.

Fram að þessu hefur verið áætlað að ferðamennska standi fyrir 2,5 til 3% af heildarlosuninni. Við það mat var hins vegar ekki tekið tillit til losunar frá matvæla- og drykkjaframleiðslu, innviðum og þjónustu sem tengist ferðamennsku, að því er segir í frétt CNN-fréttastöðvarinnar.

Úr þessu bæta vísindamenn frá Háskólanum í Sydney í Ástralíu í nýrri rannsókn sem þeir birtu í vísindaritinu Nature Climate Change í gær. Í henni kemur meðal annars fram að losun vegna ferðamennsku hefur aukist um 3% á ári frá 2009 til 2013.

Þeir ráku ferðalög ferðamanna frá heimalandinu til áfangastaðar og aftur heim, mátu kolefnislosunina sem hlaust af framleiðslu vara og þjónustu sem þeir keyptu, samgöngum á áfangastaðnum, hótelgistingunni og minjagripum.

Vísbendingar um kolefnisfrekari neyslu á ferðalagi

Stærsta kolefnisfótsporið er í Bandaríkjunum, Kína, Þýskalandi og á Indlandi. Þar eru innanlandsferðir fyrirferðarmestar.

Í litlum eyríkjum eins og Maldíveyjum, Máritíusi, Kýpur og Seychelles-eyjum er allt frá 30 til 80% af heildarlosun vegna erlendra ferðamanna.

Í rannsóknina skortir samanburð á hver losunin hefði verið ef ferðamennirnir hefðu setið heima. Arunima Malik, aðalhöfundur rannsóknarinnar, segir að vísbendingar séu þó um að neysluvenjur ferðamanna séu aðrar á ferðlögum en þegar þeir eru heima hjá sér.

„Á það hefur verið bent að fólk neytir meira af unnum matvælum og nota kolefnisfreka samgöngukosti frekar en almenningssamgöngur þegar það er á ferðalagi,“ segir Malik.

Mest losun vegna ferðalaga kemur frá flugvélum.Vísir/Vilhelm

Haldi sig frá flugi til að draga úr losun

CNN ræðir meðal annars við Jukka Heinonen, prófessor í byggingar- og umhverfisverkfræði við Háskóla Íslands. Hann segir niðurstöður Malik og félaga í samræmi við rannsókn sem gerð var á neyslu ferðamanna á Íslandi fyrir tveimur árum. Í henni kom meðal annars fram að losun vegna ferðamanna á Íslandi þrefaldaðist frá 2010 til 2015. Á bilinu 50-82% losunarinnar var vegna flugferða.

„Þetta er einn af þeim geirum þar sem losun eykst mjög hratt þar sem þetta er mjög kolefnisfrek iðja,“ segir Heinonen.

Malik og félagar búast við því að ferðamennska muni vaxa um 4% á ári á næstunni. Því sé brýnt að gera ferðamennsku vistvæna. Hún mælir með því að ferðamenn reyni að halda sig frá flugi til að draga úr losun gróðurhúsalofttegunda.






Fleiri fréttir

Sjá meira


×