Veiði

Minnivallalækur tekur við sér

Karl Lúðvíksson skrifar
Hrafn H. Hauksson með urriða úr Minnivallalæk
Hrafn H. Hauksson með urriða úr Minnivallalæk Mynd: Strengir FB
Karl Gíslason með flottan urriða Mynd: Strengir FB

Það þekkja það flestir sem hafa einhvern tímann rennt í Minnivallalæk að það liggja í honum ansi vænir fiskar sem getur verið áskorun að setja í.

Veiðin byrjar í byrjun apríl og oft er það mest straumflugur sem gefa bestu veiðina fram til loka maí.  Það virðist nú vera einhver annar bragur á því núna miðað við fréttir af holli sem var þar um liðna helgi.  Holl sem var þar við veiðar landaði 15 urriðum sem voru 50-70 sm langir og samkvæmt okkar heimildum kom ekki einn á straumflugu.  Flugan sem gaf best sést yfirleitt meira í veiðibókum þegar aðeins tekur að hlýna en það er hin veiðna Pheasant Tail.  Hún virðist að öllu jöfnu jafn sterk í vatnaveiði og straumvatni í silung enda er þessi fluga mikið notuð og uppáhald margra veiðimanna.

Sterkustu veiðistaðirnir á þessum tíma eru yfirleitt Stöðvarhylur og Húsbreiða en það var víst heldur rólegt í þeim hyljum en þess í stað var fiskurinn nokkuð dreifður um alla ána.  Stærstu fiskarnir veiddust í Viðarhólma og Hólmakvíslum.  Veiðin í Minnivallalæk er jöfn yfir allt tímabilið en það eina sem þarf að aðgæta er að vera með nettan búnað, góða breidd í flugum og læðast að veiðistöðum því hann getur verið mjög styggur fiskurinn.
 
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira