Viðskipti innlent

Gray Line á Íslandi segir upp 15 starfsmönnum

Ingvar Þór Björnsson skrifar
Þórir Garðarsson er stjórnarformaður Gray Line á Íslandi.
Þórir Garðarsson er stjórnarformaður Gray Line á Íslandi. Vísir
Gray Line á Íslandi hefur ákveðið uppsagnir um 15 starfsmanna fyrir næstu mánaðarmót vegna samdráttar í verkefnum. Um er að ræða um 5% af starfsmannafjöldanum, bílstjóra og starfsfólk í farþegaafgreiðslu.

Í tilkynningu frá fyrirtækinu kemur fram að áætlunarferðir Gray Line í Bláa lónið hafa verið ein af meginstoðum afþreyingarferða fyrirtækisins í 20 ár. Eigendur Bláa Lónsins hafa sagt upp samkomulagi við Gray Line um sölu á baðgjaldi í lónið frá 1. apríl síðastliðnum og nýtt samkomulag er ekki í boði.

„Ákvörðun Bláa Lónsins kom að vissu leyti ekki á óvart í ljósi þess að rútufyrirtæki í eigu hluthafa Bláa Lónsins hefur tekið við áætlunarferðum þangað. Þessi eigendahópur virðist hafa sammælst um að losa sig við samkeppnina til að skapa rými fyrir eigið fyrirtæki í þessum ferðum. Það er áhyggjuefni að eigendasamþjöppun af þessu tagi með tilheyrandi samkeppnishindrunum skuli vera að raungerast með svo ógagnsæjum hætti. En það er ný samkeppnisáskorun sem þarf þá að takast á við,“ segir í tilkynningunni.

Greint var frá því í ágúst á síðasta ári að Gray Line myndi sameinast Iceland Travel, dótturfélagi Icelandair Group. Seint í október var svo send út fréttatilkynning um að samruninn myndi ekki ganga eftir.

Í upphafi árs var svo greint frá því að Gray Line myndi missa stæði sín við komusal Leifsstöðvar eftir að bæði Hópbílar og Kynnisferðir buðu hærra. Gray Line tilkynnti í kjölfarið að fyrirtækið hyggðist kæra Isavia, rekstraraðila Leifsstöðvar, fyrir ofurgjaldtöku og misnotkun á einokunarstöðu sinni.






Fleiri fréttir

Sjá meira


×