Erlent

Bandaríkin, Bretar og Frakkar gera árásir á Sýrland

Samúel Karl Ólason skrifar
Donald Trump, forseti Bandaríkjanna, á blaðamannafundinum í kvöld
Donald Trump, forseti Bandaríkjanna, á blaðamannafundinum í kvöld Vísir/AFP

Donald Trump, forseti Bandaríkjanna, skipaði her sínum að gera árásir, í samvinnu með Bretum og Frökkum, á stjórnarher Bashar al-Assad, forseta Sýrlands, vegna efnavopnaárásarinnar í Douma um síðustu helgi. Árásunum var ætlað að koma í veg fyrir að stjórnarherinn gæti beitt efnavopnum á nýjan leik. Þetta tilkynnti Trump á sérstökum blaðamannafundi klukkan eitt í nótt.

Háværar sprengingar heyrðust í Damascus, höfuðborg Sýrlands, þar sem minnst eitt skotmark var staðsett. Sömuleiðis heyrðust sprengingar í Homs.

Trump hefur undanfarna daga hótað árásum á stjórnarher Sýrlands og á sama tíma hefur hann átt í viðræðum við Theresu May, forsætisráðherra Bretlands, og Emmanuel Macron, forseta Frakklands, um viðbrögð við árásinni á Douma.

Forsetinn tók fram að Bandaríkin ætluðu sér ekki að vera í Sýrlandi til lengdar. Það væri ekki markmið þeirra en hann sagði Bandaríkin og bandamenn þeirra tilbúna til að halda árásunum út þar til markmiðinu væri náð og ríkisstjórn Sýrlands hætti efnavopnaárásum.

Þá sendi hann yfirvöldum Rússlands og Íran skýr skilaboð og setti verulega út á náið samband þeirra við Bashar al-Assad. Hann sagði að heimurinn myndi dæma þjóðirnar tvær af stuðningi þeirra við Sýrland og að ekki gengi til lengdar að styðja við bakið á „hrottalegum harðstjórum og morðóðum einræðisherrum“.

„Árið 2013 lofaði Vladimir Putin, forseti Rússlands, því að þeir myndu ganga úr skugga um að Sýrland myndi eyða öllum sínum efnavopnum,“ sagði Trump.

Hann sagði það hafa mistekist algerlega og sagði hann umrædda árás ekki vera aðgerð manns. „Þessar aðgerðir eru glæpir skrímslis,“ sagði Trump.

Yfirlýsing Trump í heild sinni.

Rúmt ár frá síðustu árás
Rúmt ár er liðið frá því að Trump gaf skipun um að árás skyldi gerð á herflugvöll í Sýrlandi sem sagður var hafa verið notaður til að gera efnavopnaárás á bæinn Khan Sheikhoun

Varnarmálaráðherrann andvígur árásum

Mike Pence, varaforseti Bandaríkjanna, var staddur á kvöldverði í Lima, höfuðborg Perú, hann yfirgaf hins vegar viðburðinn í flýti í kvöld og var fluttur á hótelherbergi sitt. Þar hringdi hann í leiðtoga þingsins og sagði þeim frá ákvörðuninni.

Þá stóð neyðarfundur yfir í Hvíta húsinu í kvöld þar sem mögulegar árásir á Sýrland voru ræddar. Fjölmiðlar í Bandaríkjunum segja helstu ráðgjafa og starfsmenn Trump hafa hvatt til aðgerða en James Mattis, varnarmálaráðherra, mun hafa verið mótfallinn því.

Mattis hélt blaðamannafund í kjölfar yfirlýsingar Trump og þar kom fram að rúmlega tvöfallt fleiri sprengjum hefði verið varpað á Sýrland en gert var í fyrra. Þá var 59 Tomahawk flugskeytum skotið á flugvöll sem sagður var hafa verið notaður til að gera árásina á Khan Sheikhoun. Rússum var ekki gert viðvart um árásirnar að öðru leyti en að Bandaríkin væru með flugvélar á svæðinu. Þar eru þó væntanlega ótaldar sprengjur Breta og Frakka.

Árásir voru gerðar á þrjú skotmörk í Sýrlandi, samkvæmt hernaðaryfirvöldum Bandaríkjanna. Öll skotmörkin eru sögð tengjast efnavopnaframleiðslu ríkisstjórnar landsins og voru þau meðal annars valin með tilliti til þess að draga úr mannfalli almennra borgara.

Árásunum er nú lokið í bili.

Skotmörkin þrjú voru rannsóknarstöð í Damascus, birgðastöð í Homs þar sem efnavopn eiga að hafa verið geymd. Þriðja skotmarkið var þar nærri og munu efnavopn sömuleiðis hafa verið geymd þar.

Hér að neðan mátti fylgjast með nýjustu vendingum.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
Velkomin á Vísi. Þessi vefur notar vafrakökur. Sjá nánar.