Tónlist

Danski tónlistarmaðurinn Eloq spilar á Tivoli Bar

Stefán Þór Hjartarson skrifar
Okkar eigin Ragga Holm hitar upp fyrir Danann.
Okkar eigin Ragga Holm hitar upp fyrir Danann. fréttablaðið/Ernir
Á Tivoli Bar verður mikið stuð og fjör í kvöld en þá mun tónlistarmaðurinn, pródúserinn og plötusnúðurinn Eloq taka yfir græjurnar og skemmta gestum. Hin geðþekka Ragga Holm mun sjá um upphitun við þetta tækifæri.

Eloq er listamannsnafn August Fenger Janson en hann er hálfur Dani og hálfur Svíi, einhvers konar ofur-Skandinavi, en hann átti meðal annars lag á plötunni No Mythologies to Follow með söngkonunni MØ. Eloq er undir miklum áhrifum frá J Dilla, Timbaland og The Neptunes. Þessi drengur er líklega þekktasti trap-musik-pródús­er Dana.

Giggið á Tivoli Bar er ekki það fyrsta sem þessi ungi listamaður hefur tekið hér á landi en hann hefur oftar en einu sinni spilað á Íslandi, til að mynda fyllti hann Silfurberg á Sónarhátíðinni um árið.

Ragga Holm hefur verið að sækja í sig veðrið upp á síðkastið, er meðal annars gengin til liðs við Reykjavíkurdætur og hefur einnig verið að dúndra út tónlist með rapparanum og veiparanum Kilo á milli þess sem hún talar í útvarpið á Áttunni FM.

Tónleikarnir hefjast klukkan 2 aðfaranótt sunnudags og aðgangur er ókeypis.






Fleiri fréttir

Sjá meira


×