Innlent

Skora á stjórnvöld að gera tafarlausar breytingar á örorkulífeyri

Sylvía Rut Sigfúsdóttir skrifar
Núverandi fyrirkomulag skerðir kjör öryrkja í hverjum mánuði.
Núverandi fyrirkomulag skerðir kjör öryrkja í hverjum mánuði. Vísir/Pjetur

Landssamtökin Þroskahjálp skora á stjórnvöld að gera tafarlausar breytingar á breytingum á reglum um örorkubætur. Í tilkynningu frá samtökunum kemur fram að Þroskahjálp hafi sent bréf á Ásmund Daða Einarsson, félags- og jafnréttismálaráðherra og Katrínu Jakobsdóttur, forsætisráðherra, þann 7. febrúar síðastliðinn með áskorun um það sama. 

Í áskoruninni er skorað á stjórnvöld að samþykkja þær breytingar sem samstaða var um í nefnd um almannatryggingar sem skilaði af sér árið 2016. Kemur fram í áskoruninni að núverandi fyrirkomulag skerði kjör öryrkja í hverjum mánuði. 

Þroskahjálp lýsir miklum vonbrigðum og undrun yfir að ríkisstjórnin skuli ekki enn hafa gert það sem gera þarf til að leiðrétta þann mikla órétt gagnvart öryrkjum sem felst í núgildandi reglum. 

Áskorunina má lesa í heild sinni hér að neðan:
Landssamtökin Þroskahjálp skora á stjórnvöld að samþykkja nú þegar þær breytingar á greiðslum  örorkulífeyris sem samstaða var um í nefnd um almannatryggingar sem skilaði af sér á vordögum 2016.

Þær tillögur sem samkomulag var um í nefndinni voru að framfærsluuppbót yrði hluti af sameinuðum bótaflokki og þar með væri aflögð svokölluð króna á móti krónu skerðingu. Jafnframt lagði nefndin til að aldurstengd uppbót komi til viðbótar sameinuðum bótaflokki.

Núverandi fyrirkomulag skerðir kjör öryrkja í hverjum mánuði. Aldurstengd uppbót sem ætluð er þeim sem hafa verið öryrkjar frá unga aldri tekur ekki tillit til þeirrar sérstöðu þeirra vegna skerðingar framfærsluuppbótar um sömu fjárhæð og nemur fjárhæð bótanna.

Stjórnvöldum er ekkert að vanbúnaði að leiðrétta þetta ósanngjarna fyrirkomulag nú þegar og í framhaldi af því að skoða hvaða önnur atriði þarf að lagfæra í bótakerfinu, m.a. með tilliti til starfsgetumats.


Tengdar fréttir

Segir „krónu á móti krónu“-kerfið algjörlega gjaldþrota

Þorsteinn Víglundsson þingmaður Viðreisnar segir að núverandi kerfi sé algjörlega gjaldþrota hvað varðar örorkulífeyri, þá gagnrýnir hann einnig heilbrigðiskerfið vegna fordóma gagnvart geðrænum kvillum. Þorsteinn og Inga Sæland voru gestir Heimis Más Péturssonar í Víglínunni í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira