Innlent

Ökumenn fari varlega undir Vatnajökli

Stefán Ó. Jónsson skrifar
Það mun líklega blása um Jökulsárlón í kvöld.
Það mun líklega blása um Jökulsárlón í kvöld. Vísir/vilhelm

Veðurstofan varar við hvassviðri undir Vatnajökli í kvöld en það mun hvessa töluvert á Suðausturlandi eftir því sem líður á daginn. Af þeim sökum er gul viðvörun í gildi fyrir suðausturhornið í kvöld og nótt, meðalvindhraðinn verður á bilinu 13 til 23 m/s og verður hvassast austan Öræfa þar sem vindhviður geta farið yfir 35 m/s. Ökumenn á Suðausturlandi eru því beðnir um að fara varlega.

Annars staðar á landinu ríkir hins vegar „ákveðin og svöl“ norðanátt með éljagangi eða snjókomu á Norður- og Austurlandi, en annars er yfirleitt léttskýjað fyrir sunnan og vestan. Frostið verður á bilinu 0 til 7 stig og verður kaldast í innsveitum á Norðurlandi. Hitinn getur þó farið yfir frostmark og jafnvel náð 5 stigum syðra að deginum.

Gert er ráð fyrir hægari norðanátt á morgun og él fyrir norðan og austan. Útlit fyrir fremur hæga vinda og víða bjartviðri og kalt framan af helginni, en vaxandi suðaustanátt á sunnudag, þykknar upp og hlýnar.

Veðurhorfur á landinu næstu daga

Á fimmtudag:
Norðlæg átt, 8-13 m/s, en lægir síðdegis. Dálítil él á víð og dreif, en lengst af bjartviðri á S- og V-landi. Líkur á snjókomu vestast á Breiðafirði og Vestfjörðum seint um kvöldið. Hiti kringum frostmark, en upp í 6 stiga hiti með S- ströndinni að deginum.

Á föstudag:
Hægir vindar og víða léttskskýjað, en lítilsháttar él NV-til. Hiti við frostmark að deginum.

Á laugardag:
Breytileg eða norðaustlæg átt og skýjað með köflum, en dálítil él fyrir norðan og austan. Frostlaust syðst yfir hádaginn, en annars vægt frost.

Á sunnudag:
Vaxandi suðaustanátt, þykknar upp og hlýnar, slydda eða rigning syðst um kvöldið.

Á mánudag og þriðjudag:
Útlit fyrir austanhvassviðri með rigningu, en lengst af þurrviðri nyrðra. Milt veður.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.