Bayern meistari sjötta árið í röð

Ástrós Ýr Eggertsdóttir skrifar
Leikmenn Bayern fagna í dag
Leikmenn Bayern fagna í dag vísir/epa

Bayern München er Þýskalandsmeistari sjötta árið í röð eftir sigur á Augsburg í nágrannaslag í Bundesligunni í dag.

Leikurinn byrjaði hræðilega fyrir Bayern. Sergio Cordova rænir boltanum af Jerome Boateng í öftustu víglínu og er kominn einn inn að marki. Sven Ulreich gerir frábærlega í markinu í að koma út og verja skotið frá Cordova.

Frákastið fór hins vegar beint í Niklas Sule og þaðan í markið. Sule á leið í hjálparvörnina fyrir Boateng en skoraði sjálfsmark sem hann gat nákvæmlega ekkert gert í.

Þá var svo komið að Augsburg að gera hrikaleg varnarmistök. Joshua Kimmich sendi boltann fyrir úr aukaspyrnu og Corentin Tolisso var algjörlega óvaldaður í teignum og skoraði auðveldlega með skalla af stuttu færi.

Aðeins örfáum mínútum seinna kom James Rodriguez Bayern yfir eftir nokkuð fát í vítateig Augsburg. Arjen Robben tryggði svo sigurinn í seinni hálfleik, aftur eftir fát í teignum þar sem varnarmenn Augsburg náðu ekki að hreinsa boltann.

Rósin í hnappagatið kom svo frá Sandro Wagner á 87. mínútu þegar hann skallaði fyrirgjöf Sebastian Rudy í markið.

Þýskir miðlar höfðu greint frá því fyrir leikinn að Alfreð Finnbogason væri orðinn heill og yrði líklegast með í leiknum í dag, haft var eftir Manuel Baum, stjóra Augsburg, að hann gæti jafn vel verið í byrjunarliðinu. Svo fór ekki, íslenski landsliðsmaðurinn var ekki í hóp hjá Augsburg í dag.






Úrslit dagsins í Bundesligunni:
1-4 Augsburg - Bayern München
2-1 Monchengladback - Hertha Berlin
1-1 Köln - Mainz
0-2 Freiburg - Wolfsburg

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.