Erlent

Á móti umferðarsektum en lofar þrælahald

Samúel Karl Ólason skrifar
El Shafee Elsheikh (til hægri) og Alexanda Kotey (til vinstri). Ekki er vitað hvenær myndirnar voru teknar en þær voru teknar eftir að þeir voru handsamaðir í janúar.
El Shafee Elsheikh (til hægri) og Alexanda Kotey (til vinstri). Ekki er vitað hvenær myndirnar voru teknar en þær voru teknar eftir að þeir voru handsamaðir í janúar. Vísir/AFP

El Shafee El Sheikh, vígamaður Íslamska ríkisins, sem var einn af „Bítlum“ ISIS, sér ekki eftir neinu og segir að hann myndi taka sömu ákvarðanir aftur. El Sheikh er nú í haldi Kúrda í Sýrlandi þar sem hann ræddi við blaðakonuna Jenan Moussa. Hún segir frá viðtalinu á Twitter og tekur sérstaklega fram hvernig hann virtist vorkenna sjálfum sér.

Bítlarnir svokölluðu voru alræmdur hópur erlendra vígamanna ISIS sem fengu nafnið vegna hreims þeirra. Allir voru frá vesturhluta London og pyntuðu fjórmenningarnir vestræna gísla samtakanna og tóku þá af lífi. El Sheikh er sakaður um að hafa aflífað blaðamenn sem voru í haldi ISIS. Vitað er að þeir myrtu minnst sjö gísla en talið er að þeir hafi verið fleiri.

ElSheikh og Alexanda Kotey voru handsamaðir í Sýrlandi í byrjun ársins. Mohammed Emwazi, sem gekk undir nafninu Jihadi John, var felldur í loftárás árið 2015 og Aine Davis var handtekinn í Tyrklandi.

Sjá einnig: Síðustu „Bítlarnir“ í haldi Kúrda

ElSheikh viðurkenndi að hafa meðlimur ISIS en vildi ekki segja hvað hann hefði gert fyrir samtökin og sagði að það gæti beðið þar til réttarhöld yfir honum byrjuðu. Það liggur þó ekki fyrir hvar eða hvort réttað verður yfir honum. Bretar hafa til dæmis fellt niður ríkisborgararétt ElSheikh.

Kúrdar halda hundruðum erlendra vígamanna ISIS sem heimaríki þeirra vilja ekkert með hafa og vilja ekki fá heim aftur. ElSheikh vildi einnig ekki segja hvar hann hefði verið handsamaður, en sýrlenskir Kúrdar sögðu það hafa verið nærri Deir Ezzor og hann hafi þá verið á leið til Idlib.

Þegar Moussa spurði hann hvort hann hefði verið ósammála einhverju innan Íslamska ríkisins sagðist hann hafa verið á móti umferðarsektum. Skömmu seinna sagðist hann styðja þrælahald.

„Þú verður að skilja, að þó Bandaríkin hafi ákveðið að fella eitthvað niður, ég veit ekki hvaða ár það var, þá þýðir það ekki að hver einasta manneskja verði að fylgja þeim. Segja að þetta sé nú hræðilegur hlutur sem enginn megi gera. Staðreyndin er sú að þrælahald hefur verið til staðar eins lengi og mannkynið.“

ElSheikh virtist ekki hafa verið sáttur við Bítlanafnið. Hann sagðist ekki hlusta á tónlist og vildi ekki tjá sig um það að öðru leyti en að hann þóttist viss um að John Lennon hefði ekki verið ánægður með það.

Vildi engu svara um gíslana
Moussa reyndi einnig að spyrja ElSheikh út í örlög James Foley, Kayla Mueller, John Cantlie, Samir Kassab, Ishaq Mukhtar, gísla ISIS. Hann vildi þó ekki tjá sig um það og neitaði að svara spurningum hennar. Hann sagðist þó ekki hafa horft á aftökumyndbönd Íslamska ríkisins og að hann vildi ekki gera það og þætti ekki gaman að horfa á slíkt.

ElSheikh vildi ekki senda skilaboð til fjölskyldu sinnar í Bretlandi, sem hefur afneitað honum, og brást reiður við þegar Moussa sagðist mögulega ætla að heimsækja móður hans. Sömuleiðis neitaði hann þegar Kúrdar buðu honum að senda bréf til fjölskyldu sinnar.

Moussa hefur áður rætt við meðlimi ISIS og segir hún að ElSheikh hafi verið svipaður og aðrir að því leyti að hann virtist einungis vorkenna sjálfum sér og sýndi engar tilfinningar gagnvart fórnarlömbum grimmdarverka Íslamska ríkisins. Eftir að hann varð reiður og slökkt var á myndavélunum ræddu þau saman um stund og þá sagði ElSheikh að ef hann gæti farið aftur til ársins 2012 myndi hann taka sömu ákvarðanir aftur.


Tengdar fréttir

„Ég er kominn aftur Obama“

Hinn Breski rappari Abdel-Majed Abdel Bary er nú talinn hafa myrt tvo blaðamenn í nafni Íslamska ríkisins.

Morðingjar Foleys kröfðust 132 milljóna dollara lausnargjalds

Vinnuveitandi bandaríska blaðamannsins James Foleys hefur upplýst að samtökin hafi krafist 132 milljóna dollara lausnargjalds fyrir Foley á síðasta ári. Fyrirtækið tók lausnargjaldskröfuna ekki alvarlega sökum þess hversu há hún var.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.