Fótbolti

Ráð Marcello Lippi til Ryan Giggs: Sýndu hvað þú lærðir af Sir Alex Ferguson

Óskar Ófeigur Jónsson skrifar
Ryan Giggs og Sir Alex Ferguson.
Ryan Giggs og Sir Alex Ferguson. Vísir/Getty
Fyrsti leikur Ryan Giggs sem landsliðsþjálfara Wales verður á móti miklum reynslubolta og heimsmeistaraþjálfara. Wales mætir Kína og þar situr Marcello Lippi í þjálfarastólnum.

Marcello Lippi var spurður á blaðamannafundi um hvaða ráða hann gæti gefið Ryan Giggs í hans nýja starfi hjá Wales. Lippi er 69 ára gamall og í sínu sextánda þjálfarastarfi.

„Mér finnst ekki eins og ég þurfi að gefa honum einhver ráð,“ sagði Marcello Lippi sem gerði Ítala að heimsmeisturum árið 2006.





„Hann var með besta stjórann í Sir Alex Ferguson hjá Manchester United. Hann verður bara að gera það sem hann lærði hjá honum,“ sagði Lippi.

Aðeins einn annar þjálfari hefur náð að vinna bæði HM og Meistaradeildina eins og Marcello Lippi sem vann Meistaradeildina með Juventus árið 1996. Hinn er Vicente del Bosque sem vann HM með spænska landsliðinu (2010) og Meistaradeildina með Real Madrid (2000 og 2002).

Ryan Giggs og Sir Alex Ferguson unnu 34 titla saman hjá Manchester United þar af ensku deildina þrettán sinnum og Meistaradeildina tvisvar.




Fleiri fréttir

Sjá meira


×