Handbolti

Ævintýri Fram heldur áfram

Ingvi Þór Sæmundsson skrifar
Selfoss - Fram, Selfoss, Fram, handbolti, handknattleikur, 2018, coca cola bikarinn, final four
Selfoss - Fram, Selfoss, Fram, handbolti, handknattleikur, 2018, coca cola bikarinn, final four

Handbolti Það verða Fram og ÍBV sem eigast við í úrslitaleik Coca Cola-bikars karla í handbolta í dag.

Seinni undanúrslitaleikurinn, milli Selfoss og Fram, var afar sveiflukenndur og frábær skemmtun. Selfyssingar leiddu með þremur mörkum í hálfleik, 15-12. Í seinni hálfleik vaknaði hinn 17 ára gamli Viktor Gísli Hallgrímsson til lífsins í marki Fram. Með hann í miklum ham milli stanganna náðu Frammarar yfirhöndinni og komust mest þremur mörkum yfir, 19-22.

Selfoss lagði ekki árar í bát, skoraði fjögur af síðustu fimm mörkum leiksins og tryggði sér framlengingu.

Framlengingin var jöfn og aldrei munaði meira en einu marki á liðunum. Selfyssingar fengu tvö tækifæri til að tryggja sér sigurinn í lokasókninni en Viktor Gísli varði bæði skot þeirra.

Í vítakeppninni nýtti Fram öll sín víti en Teitur Örn Einarsson skaut í stöng úr öðru víti Selfoss sem reyndist dýrkeypt. Fram fagnaði sigri, 31-32.

Ótrúlegur viðsnúningur
Haukar voru lengst af með frumkvæðið gegn ÍBV og þegar 16 mínútur voru eftir kom Heimir Óli Heimisson Hafnfirðingum fjórum mörkum yfir, 20-16. Þá sögðu Eyjamenn hingað og ekki lengra, skoruðu níu mörk gegn engu og náðu fimm marka forskoti, 20-25.

Haukar áttu ágætis áhlaup á lokamínútunum en tíminn var of naumur og ÍBV fagnaði tveggja marka sigri, 25-27. Aron Rafn Eðvarðsson lagði grunninn að sigrinum með frábærri markvörslu í seinni hálfleik. ÍBV getur bætt þriðja bikartitlinum í safnið í dag



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira