Golf

Woods höggi frá bráðabana

Ástrós Ýr Eggertsdóttir skrifar
Það er allt á uppleið hjá Tiger.
Það er allt á uppleið hjá Tiger. vísir/getty

Tiger Woods var einu höggi frá því að tryggja sér bráðabana á Valspar mótinu í golfi en mótið er hluti af PGA mótaröðinni.

Woods byrjaði daginn einu höggi á eftir Kanadamanninum Corey Conners sem hafði leitt mótið alla helgina en Woods hefur ekki unnið mót síðan árið 2013.

Fyrir síðustu þrjár holurnar var Englendingurinn Paul Casey með tveggja högga forystu á Tiger Woods, en hann kom í hús rúmum klukkutíma á undan Woods.

Loka holurnar þrjár á vellinum í Flórída eru mjög erfiðar og gefa ekki mörg færi á fuglum. Woods nýtti hins vegar alla reynslu sína og setti niður glæsilegt pútt fyrir fugli á 17. holu og minnkaði forskot Casey niður í eitt högg.

Hann náði að stilla upp langt pútt fyrir fugli á 18. holunni og hefði getað tryggt sér bráðabana hefði hann sett það ofan í, en var of stuttur og Casey fór með sigurinn.


 

Woods endaði í 2.-3. sæti með landa sínum Patrick Reed á níu höggum undir pari.

Reed var jafn Casey í forystunni fyrir loka holuna en þar lenti hann í vandræðum og fékk skolla.

Conners átti virkilega slæman dag í dag og endaði mótið í 16.-27. sæti á þremur höggum undir pari, en hann fór hringinn í dag á 6 höggum yfir pari.


 
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira