Fótbolti

Þá sem vantar miða á HM fá annan séns í fyrramálið

Tómas Þór Þórðarson skrifar
Jæja, reynum aftur.
Jæja, reynum aftur. Vísir/Getty

Næsti miðasölugluggi fyrir HM 2018 í fótbolta verður opnaður í fyrramálið, 13. mars, klukkan níu að íslenskum tíma.

Að þessu sinni er um að ræða sölu þar sem miðakaupendur fá strax svar um hvort þeir fái miðann og er notast við fyrirkomulagið fyrstur kemur, fyrstur fær. KSÍ greinir frá á heimasíðu sinni.

Verið er að úthluta síðustu miðunum úr síðasta miðasöluglugga í dag og svo hefst næsta kapphlaup í fyrramálið.

KSÍ bendir þeim sem hafa fengið miða en ætla ekki að nýta þá að bíða eftir að endursöluglugginn opni hjá FIFA. Fólk á ekki að reyna að selja miðana sína sjálft og ekki kaupa neina miða nema af miðasöluvef FIFA.

Þeir sem hafa ekki enn fengið miða eru hvattir til að reyna að ná í miða í glugganum sem opnar á þriðjudaginn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira