Silva með bæði mörkin í sigri City sem færist nær titlinum

David Silva skoraði bæði mörk Manchester City í 2-0 sigri City á Stoke er liðin mættust í Stoke í kvöld. Með sigrinum færist City skrefi nær titlinum.

Silva kom City yfir strax á tíundu mínútu eftir sendingu frá Raheem Sterling, en varnarleikur Stoke var ekki uppi á marga fiska í því marki. 1-0 í hálfleik.

Eftir fimm mínútna leik skoraði Silva aftur, en þessi frábæri knattspyrnumaður skoraði þá eftir unidrbúning Gabriel Jesus sem byrjaði í fremstu víglínu í fjarveru Aguero sem er meiddur.

Lokatölur 2-0 og City er því með sextán stiga forskot á granna sína í Man. United þegar átta leikir eru eftir, en 24 stig eru eftir í pottinum.