Golf

Valdís Þóra missti af niðurskurðinum eftir klúður á síðustu holu

Óskar Ófeigur Jónsson skrifar
Valdís Þóra Jónsdóttir.
Valdís Þóra Jónsdóttir. LET/Tristan Jones

Átjánda holan á Coffs Harbour vellinum í Ástralíu á eflaust eftir að vera uppspretta martraða fyrir íslenska kylfinginn Valdísi Þóru Jónsdóttur en hún komst ekki í gegnum niðurskurðinn á opna Nýja Suður-Wales golfmótinu í nótt.

Valdís Þóra lék annan daginn á pari og er því á fimm höggum yfir pari samtals. Hún er í 67. sæti eftir þessa tvo daga.

Valdís Þóra var í ágætum málum þegar hún kom inn á átjándu enda búin að leika fyrstu sautján holur hringsins mjög vel eða á tveimur höggum undir pari.

Valdís tapaði hinsvegar tveimur höggum á lokaholunni og það voru einmitt þessi tvö högg sem koma í veg fyrir að hún fari í gegnum niðurskurðinn sem var þrjú högg yfir par.

Valdís hafði tapað þremur höggum á átjándu holunni í gær og hefur því spilað þessa vandræðaholu á fimm höggum yfir pari á þessum tveimur dögum. Hún er samtals á pari á öllum hinum holunum sautján.

Það þarf því ekki að leita lengi að örlagavaldi okkar konu á þessu fjórða móti hennar á Evrópumótaröðinni á þessu tímabili.

Valdís fékk fjóra fugla á hringnum í dag þar af einn á sautjándu en hinir komu á fimmtu, sjöundu og fjórtándu. Hún spilaði því sjöundu og fjórtándu á samanlagt fjórum höggum færra en í gær þegar hún fékk skolla á þeim báðum.

Skorkortið hennar Valdísar frá fyrstu tveimur dögunum. LET


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira