Erlent

23 þúsund heimili á Írlandi án rafmagns vegna Emmu

Sylvía Hall skrifar
Samgöngur á Írlandi hafa fengið að finna fyrir vetrarhörkunni síðustu daga
Samgöngur á Írlandi hafa fengið að finna fyrir vetrarhörkunni síðustu daga Vísir/AP

Útgöngubanni hefur verið aflétt í Írlandi eftir að stormurinn Emma gekk yfir landið í gær. Aðstæður eru þó erfiðar víðs vegar um landið og liggja almenningssamgöngur enn niðri, að því er fram kemur í írska Independent.

Um 23.000 heimili eru án rafmagns eftir nóttina þegar stormurinn náði hámarki og sjá margir fram á að vera án þess fram eftir degi, en skemmdir urðu á raforkukerfinu í 190 tilfellum. Þar af eru tíu þeirra taldar stórvægilegar. Í Galway á Vestur-Írlandi eru einnig fimm þúsund manns án vatns.

Yfir nóttina var yfir hundrað manns komið fyrir í hjálparmiðstöð vegna veðursins og var reynt að koma sem flestum fyrir í öruggt skjól, en rúmlega 20 manns fundust sofandi á götum Dublin í óveðrinu.

Þrátt fyrir að veðuraðstæður fari skánandi horfa Írar fram á flóðahættu vegna úrkomunnar sem fylgir storminum og er talið að um 30 þúsund tonn af salti fari í að salta götur landsins næstu daga. 


Tengdar fréttir

Á sjötta tug látist í frosthörkunum

Nóttin var köld í Evrópu og þó ekki sé langt liðið á daginn eru þegar farnar að berast fréttir af dauðsföllum vegna frosts næturinnar.

Frost fór niður í 42 gráður í Noregi

Frost fór niður í 42 gráður á selsíus í Heiðmörk í Noregi í nótt. Norska veðurstofan segir þetta nýtt met fyrir mælistöðina við bæinn Folldal í Heiðmörk.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira