Erlent

Mueller rannsakar hvort arabar hafi keypt pólitíska greiða hjá Trump

Kjartan Kjartansson skrifar
Trump Bandaríkjaforseti og Mohammed bin Zayed al-Nahyan, krónprins Abú Dabí, takast í hendur í Hvíta húsinu í maí í fyrra. Nahyan er æðsti yfirmaður herafla Sameinuðu arabísku furstadæmanna og raunverulegur leiðtogi sambandsríkisins.
Trump Bandaríkjaforseti og Mohammed bin Zayed al-Nahyan, krónprins Abú Dabí, takast í hendur í Hvíta húsinu í maí í fyrra. Nahyan er æðsti yfirmaður herafla Sameinuðu arabísku furstadæmanna og raunverulegur leiðtogi sambandsríkisins. Vísir/AFP

Vitni sem hafa gefið rannsakendum Roberts Mueller, sérstaks rannsakanda bandaríska dómsmálaráðuneytisins, skýrslu hafa verið spurð út í mögulegar tilraunir fulltrúa Sameinuðu arabísku furstadæmanna til að kaupa sér pólitísk áhrif með því að veita fé til forsetaframboðs Donalds Trump.

New York Times greindi frá þessu um helgina og hafði eftir heimildarmönnum sínum. Spurningarnar bendi til þess að rannsókn Mueller sé að færa út kvíarnar en upphaflega var henni ætlað að kanna afskipti Rússa af forsetakosningunum árið 2016 og mögulegu samráði þeirra við framboð Trump. Mueller hefur þó heimild til að rannsaka öll mál sem kom upp við þá rannsókn.

Athygli rannsakendanna er meðal annars sögð beinast að George Nader, bandarískum athafnamanni af líbönskum ættum. Nader hefur verið ráðgjafi Mohammed bin Zayed al-Nahyan, krónprins Abú Dabí og yfirmanns herafla Sameinuðu arabísku furstadæmanna, og vandi hann komur sínar í Hvíta húsið í fyrra.

Rannsakendurnir eru sagðir hafa spurt vitni út í aðkomu Nader að stefnumótun Hvíta hússins. Nader heimsótti Hvíta húsið oft á fyrstu mánuðum forsetatíðar Trump og ræddi meðal annars við Jared Kushner, tengdason Trump, og Stephen Bannon, þáverandi aðalráðgjafa forsetans, um stefnu Bandaríkjanna gagnvart Persaflóaríkjunum. Ræddi hann meðal annars við þá í aðdraganda opinberrar heimsóknar Trump til Sádí-Arabíu.

Heimildum blaðsins ber ekki saman um hvort að Bannon eða Kushner hafi greitt fyrir aðgangi Nader að Hvíta húsinu.

Vildi að Trump ræki utanríkisráðherrann

Samkvæmt heimildum New York Times vingaðist Nader við Elliot Broidy, eiganda öryggisfyrirtækis og fjáraflara fyrir forsetaframboð Trump, eftir að Trump tók við embætti í fyrra. Kynnti hann Broidy fyrir Nahyan krónprins. Í kjölfarið skrifuðu Sameinuðu arabísku furstadæmin undir samninga við fyrirtæki Broidy sem voru mörg hundruð milljón dollara virði.

Í október sendi Broidy Nader nákvæmt minnisblað um fund sem sá fyrrnefndi átti með Trump forseta í Hvíta húsinu þar sem Broidy talaði máli Sameinuðu arabísku furstadæmanna.

Á fundinum lagði Broidy að Trump að hann hitti Nahyan krónprins „við óformlegar aðstæður“ og styddi harða stefnu Sameinuðu arabísku furstadæmanna í heimshlutanum. Vildi Broidy einnig að Trump ræki Rex Tillerson, utanríkisráðherra sinn. Samkvæmt minnisblaði Broidy tók Trump vel í fund með krónsprinsinum. H.R. McMaster, þjóðaröryggisráðgjafi forsetans, hafi hins vegar verið mótfallinn því að fundurinn yrði óformlegur.

Rex Tillerson, utanríkisráðherra Bandaríkjanna, reyndi að miðla málum þegar nágrannaríki Katar einangruðu landið. Trump tók afstöðu gegn Katar, þvert á áralanga stefnu Bandaríkjastjórnar í heimshlutanum. Vísir/EPA

Blaðið segir að Trump hafi gert Sameinuðu arabísku furstadæmin að nánum bandamanni. Hann hafi stutt eindregin stuðning þeirra við nýjan leiðtoga Sádí-Arabíu og aðgerðir þeirra gegn nágrannaríkjunum Íran og Katar.

Sameinuðu arabísku furstadæmin voru í hópi arabaríkja sem lokuðu á samskipti við Katar síðasta sumar. Katarar hafa verið nánir bandamenn Bandaríkjastjórnar. Trump studdi hins vegar nágrannaríkin gegn Katar, þvert á afstöðu Tillerson utanríkisráðherra og annarra bandarískra embættismanna.

Broidy sakar útsendara Katar um að hafa brotist inn og stolið tölvupósti hans með minnisblaðinu. Það hafi þeir gert til að refsa honum fyrir einarða afstöðu hans gegn „ríkisstuddri hryðjuverkastarfsemi“. Arabaríkin sem rufu stjórnmálatengsl við Katar í fyrra sökuðu stjórnvöld þar meðal annars um að styðja hryðjuverkastarfsemi.

Misheppnuð fjármögnunartilraun tengd við afstöðu Kushner til Katar

Fréttirnar af áhuga Mueller á Nader og mögulegum tengslum forsetaframboðs Trump við Sameinuðu arabísku furstadæmin koma fast á hæla uppljóstrana um hugsanlega hagsmunaárekstra Jareds Kushner, tengdasonar Trump og eins helsta ráðgjafa forsetans.

Þannig sagði The Intercept, vefmiðill Glenns Greenwald, fyrrverandi blaðamanns The Guardian sem sagði fyrst frá víðtæku eftirliti Þjóðaröryggisstofnunar Bandaríkjanna, frá því að fjölskyldufyrirtæki Kushner hefði leitað beint til fjármálaráðherra Katar um fjárfestingu í fasteignaverkefni í apríl í fyrra.

Fasteignaverkefnið hefur átt í miklum fjárhagskröggum og er lán vegna þess upp á rúmlega milljarð dollara sagt á gjalddaga í byrjun næsta árs. Ekkert varð hins vegar úr fjárfestingu Katara í verkefninu.

Aðeins mánuði eftir að upp úr viðræðum fyrirtækis Kushner við Katar slitnaði byrjuðu nágrannaríkin að beita landið viðskiptaþvingunum og slitu stjórnmálasambandi. Kushner fylgdi þá nágrannaríkjum Katar að máli. Hann er jafnframt sagður hafa grafið undan tilraunum Tillerson utanríkisráðherra til að miðla málum.

Jared Kushner hefur átt undir högg að sækja undanfarið. Hann missti aðgang sinn að trúnaðargögnum eftir að öryggisheimild hans var lækkuð nýlega. Þá er sérstakur rannsakandi dómsmálaráðuneytisins sagður rannsaka fundi og viðskipti hans við erlend ríki. Vísir/AFP

Flókið net viðskiptahagsmuna og skulda

Fréttastofa NBC-sjónvarpsstöðvarinnar sagði frá því fyrir helgi að rannsakendur Mueller hefðu spurt vitni út í tilraunir Kushner til að tryggja fjölskyldufyrirtækinu fjármögnun eftir að Trump var kjörinn forseti. Kushner er meðal annars sagður hafa fundað með fulltrúum frá Katar, Tyrklandi, Rússlandi, Kína og Sameinuðu arabísku furstadæmunum á þeim tíma.

Embættismenn frá Katar hafi hugleitt að afhenda Mueller gögn sem þeir töldu sannanir fyrir því að Kushner hafi unnið með nágrannaríkjunum til að koma höggi á landið. Ekkert hafi orðið af því vegna þess að embættismennirnir óttuðust að það gæti skaðað tengsl Katar við Hvíta húsið enn frekar.

Þá var öryggisheimild Kushner lækkuð fyrir rúmri viku en hann hafði þá ekki fengið umsókn sína um hana samþykkta í fleiri mánuði. Áhyggjur alríkislögreglunnar FBI af samskiptum Kushner við fulltrúa erlendra ríkja voru ástæða þess að umsóknin var ekki afgreidd. Kushner hefur því ekki lengur aðgang að sömu trúnaðarupplýsingum í Hvíta húsinu og hann hafði áður.

Kushner uppfærði umsókn sína um öryggisheimild meðal annars ítrekað með samskiptum við fulltrúa erlendra ríkja sem hann hafði vanrækt að gefa upp.

Washington Post sagði einnig frá því í síðustu viku að embættismenn að minnsta kosti fjögurra ríkja hefðu rætt um hvernig þeir gætu nýtt sér flókið net viðskiptahagsmuna Kushner, skulda fyrirtækja hans og reynsluleysi í opinberum erindrekstri til að hafa áhrif á stefnu Hvíta hússins.


Tengdar fréttir

Erlend ríki reyna að notfæra sér tengdason Trump

Fáir starfsmenn Hvíta hússins hafa haft eins flókið net viðskiptahagsmuna og skulda og Jared Kushner, tengdasonur Trump Bandaríkjaforseta. Erlend ríki eru sögð reyna að notfæra sér reynsluleysi hans og viðskiptahagsmuni.

Öryggisheimild tengdasonarins afturkölluð

Jared Kushner, tengdasonur Donald Trump og einn af hans helstu ráðgjöfum, fær ekki lengur aðgang að háleynilegum skjölum og gögnum í starfi sínu, eftir að öryggisheimild hans var lækkuð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira