Innlent

Brýnt að skera úr um stuðning við dómsmálaráðherra að mati Loga

Heimir Már Pétursson skrifar
Logi telur umboðsmann Alþingis taka að mörgu leyti undir athugasemdir sínar og annarra þingmanna við störf ráðherra
Logi telur umboðsmann Alþingis taka að mörgu leyti undir athugasemdir sínar og annarra þingmanna við störf ráðherra vísir/Ernir

Forseti Alþingis fundar með þingflokksformönnum klukkan eitt þar sem væntanlega verður ákveðið hvenær vantrauststillaga Samfylkingarinnar og Pírata á dómsmálaráðherra fer fram og með hvaða hætti umræðan verður. Fyrsti flutningsmaður tillögunnar segir að stjórnarþingmenn hljóti hver og einn að velta fyrir sér hvort rétt sé að dómsmálaráðherra sitji áfram.

Stjórnskipunar- og eftirlitsnefnd Alþingis hefur fjallað ítarlega um embættisfærslur Sigríðar Andersen dómsmálaráðherra í tengslum við skipan fimmtán dómara í nýjan Landsrétt, þar sem hún skipti út fjórum dómurum á lista hæfisnefndar. Logi Einarsson formaður Samfylkingarinnar er fyrsti flutningsmaður vantrauststillögu sem þingflokkar Samfylkingarinnar og Pírata hafa lagt fram á Alþingi á dómsmálaráðherra. Hann minnir á að Hæstiréttur hafi í tvígang kveðið upp dóm vegna embættisfærslna dómsmálaráðherrans sem hafi skapað óvissu um dómstóla landsins.

„Við töldum rétt að þetta kæmi fram núna þar sem umboðsmaður Alþingis hefur hefur í raun fjallað um málið. Það er skýrt að það er ekkert sem er óljóst í málinu sem vitað er um. Hann tekur að mörgu leyti finnst mér undir þær athugasemdir sem við og stjórnskipunar- og eftirlitsnefnd höfum gert,“ segir Logi.

Landsréttur kvað nýlega upp þann dóm að þrir af dómurum réttarins væru ekki vanhæfir til að sinna störfum sínum vegna þess með hvaða hætti skipun þeirra kom til. En Vilhjálmur H. Vilhjálmsson hæstaréttarlögmaður kærði málið til réttarins og hefur nú áfrýjað því til hæstaréttar. Logi telur ekki nauðsynlegt að bíða eftir þeim dómi áður en vantraust verði borið upp.

Gæti skapast réttaróvissa til margra ára
„Sú óvissa og sá málarekstur sem sem er einmitt í kring um hæfi einstakra dómara er afleiðing af ólögmætum embættisfærslum hennar. Það mun ekkert breytast þótt það komi nýr ráðherra en það þarf að vera ráðherra sem er treystandi til að fara með dómstólana í landinu,“ segir formaður Samfylkingarinnar.

Fari mál þessara dómara hins vegar alla leið til Evrópudómstólsins sé komin upp alvarleg staða.

„Þá erum við kannski að tala um tveggja ára tímabil þar sem óvissa ríkir. Og ef málið fer illa þar þá er sú staða í raun uppi að allir dómar sem hafa verið kveðnir upp á þessu tímabili af þessum dómurum eru ógildir,“ segir Logi.

Þá vakni spurningar um skaðabótaskyldu stjórnvalda og afleiðingar þeirrar stöðu fyrir hagsmuni fjölda fólks. Því sé brýnt að fá fram hvaða þingmenn beri traust til dómsmálaráðherrans.
Vantrauststillaga sjö þingmanna Samfylkingarinnar og sex þingmanna Pírata dugar þó ekki til þess að fella Sigríði Andersen úr embætti dómsmálaráðherra.

Eruð þið að reikna með stuðningi frá öðrum þótt þeir beri tillöguna ekki fram með ykkur?

„Já að sjálfsögðu erum við að gera það. Það hefur margt komið fram í ræðum fólks úr þeim flokkum sem bendir til þess. Þar fyrir utan held ég að hver og einn stjórnarþingmaður hljóti að hugsa sinn gang og velt því fyrir sér hvort að það vantraust sem ríkir sé best endurreist með því að Sigríður Andersen sitji áfram,“ segir Logi Einarsson.

Það kemur síðan í ljós eftir fund forseta Alþingis með þingflokksformönnum klukkan eitt hvort vantraustumræðan fer fram í dag eða síðar.


Tengdar fréttir

Telur að hún hafi stuðning þingsins

Sigríður Á. Andersen, dómsmálaráðherra, segist ávallt fagna því að geta rætt sín störf en Samfylkingin og Píratar hafa lagt fram vantrauststillögu á ráðherrann vegna Landsréttarmálsins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.