Tíska og hönnun

Fræga fólkið sólgið í iglo+indi

Guðný Hrönn skrifar
Helga Ólafsdóttir, hönnuður iglo+indi.
Helga Ólafsdóttir, hönnuður iglo+indi. SAGA SIG
Íslenska barnafatamerkið iglo+indi hefur náð góðum árangri utan landsteinanna því Hollywood-búar eru margir hrifnir og klæða börnin sín í iglo+indi föt þegar mikið liggur við.

Það liggur ekki á svörum þegar Karítas Diðriksdóttir, markaðsstjóri iglo+indi, er spurð út í hvaða fræga fólk hafi sýnt barnafötunum frá iglo+indi áhuga.

Kourtney Kardashian dressar dóttur sína í íslenska hönnun.@igloindi
„Kardashian-fjölskyldan, ofurfyrirsætan Coco Rocha og stílisti barna Beyoncé eru líklega frægustu aðdáendur iglo+indi. Kourtney Kardashian birti mynd af dóttur sinni í gervipelsi frá iglo+indi á Snapchat um daginn og Coco Rocha er orðin góð vinkona okkar eftir að hún heimsótti Ísland fyrir nokkrum árum og kynntist merkinu þá. Dóttir hennar, Ioni Conran, klæðist mjög oft fötum eftir okkur. Ioni er sjálf með hátt í 70 þúsund fylgjendur á Instagram.“

Þessi mynd vakti athygli stílistans Manuels A. Mendez.MYND/SAGA SIG
Eins og gengur og gerist í Hollywood eru börn fræga fólksins gjarnan með stílista. 

Blue Ivy, dóttir Beyoncé og Jay Z, er eitt þeirra barna og stílisti hennar, Manuel A. Mendez, er hrifinn af iglo+indi.

Hann birti mynd úr nýjustu línu iglo+indi á samfélagsmiðlum um daginn. 

„Myndin sem Manuel deildi er úr vor/sumar herferðinni okkar.

Atli vinur okkar er í peysu með ísaumaðri antilópu, stuttbuxum með antilópuprenti og sokkum með eldingu.

Myndin er tekin af Sögu Sig við Kleifarvatn,“ útskýrir Karítas sem er í reglulegu sambandi við stílista fræga fólksins sem biðja gjarnan um um sýnishorn úr línu iglo+indi fyrir til dæmis myndatökur.

Beyoncé lætur stílista að sjálfsögðu um að dressa dóttur sína, Blue Ivy.Vísir/Getty

Ísland vekur áhuga

Karítas segir tenginguna við Ísland koma sér vel fyrir merkið. „Fólk er almennt mjög áhugasamt um að við séum frá Íslandi. Ísland er oft innblásturinn fyrir litina og prentin og lundaprentið okkar er búið að vera vinsælasta prentið í mörg ár.“

Karítas segir teymi iglo+indi hafa byrjað að leggja áherslu á markaðssetningu erlendis fyrir um fjórum árum.

„Vörumerkið var endurnefnt iglo+indi og við byrjuðum að taka virkan þátt í sýningum erlendis,“ segir Karítas en merkið hét áður Ígló og Indí.

Í dag fæst merkið víða erlendis.

„Söluaðilar okkar í Evrópu, Ameríku og Asíu ferðast einnig á sýningar á sínum heimamörkuðum.“






Fleiri fréttir

Sjá meira


×