Erlent

Formaður NRA hellti úr skálum reiði sinnar vegna umræðu eftir skólaárás

Kjartan Kjartansson skrifar
Forsvarsmaður stærstu hagsmunasamtaka skotvopnaeigenda í Bandaríkjunum, NRA, sakar demókrata og fjölmiðla um að notfæra sér fjöldamorð í framhaldsskóla á Flórída í síðustu viku til að berjast fyrir hertri skotvopnalöggjöf. Fullyrti hann að demókratar „hati einstaklingsfrelsi“.

NRA fékk heila klukkustund til þess að lýsa afstöðu sinni á fjölmennri ráðstefnu íhaldsmanna í Bandaríkjunum, CPAC, í dag. Þar fór Wayne LaPierre, formaður NRA, mikinn og varaði byssueigendur við því að nú ætti að hrifsa af þeim byssurnar. Sakaði hann „elítuna“ um að vera sama um skólakerfið og nemendur. Fyrir þeim væru skotárásir pólitík en ekki spurning um öryggi, að því er kemur fram í frétt breska ríkisútvarpsins BBC.

„Þeim er meira annt um völd og meira af þeim. Markmið þeirra er að útrýma öðrum viðaukanum [við stjórnarskrá Bandaríkjanna] og byssufrelsið okkar svo að þeir geti upprætt allt einstaklingsfrelsi,“ sagði LaPierre en annar viðauki stjórnarskrárinnar hefur síðustu áratugina verið túlkaður þannig að hann gefi almenningi rétt til að bera og eiga skotvopn.

LaPierre réðst einnig að þeim sem hann kallaði „sósíalista að evrópskri fyrirmynd“ sem krefjist aukins eftirlits með skotvopnum. Varaði hann við uppgangi kommúnisma í bandarískum háskólum og lýsti sósíalisma sem „pólitískum sjúkdómi“, að því er segir í frétt The Guardian.

Telur engan mun á skólum og herstöðvum

Mikil umræða hefur blossað upp um skotvopnalöggjöfina eftir að ungur maður myrti sautján manns í Marjory Stoneman Douglas-framhaldsskólanum í Parkland á Flórída á Valentínusardaginn, 14. febrúar. Nemendur sem lifðu árásina hafa talað opinskátt um þörfina á að herða byssulöggjöfina til að koma í veg fyrir að harmleikir af þessu tagi endurtaki sig.

LaPierre tók undir hugmyndir Donalds Trump forseta um að vopna kennara til að fyrirbyggja skotárásir sem forsetinn lýsti á fundi með nemendum og foreldrum barna sem létust í skotárásinni í Hvíta húsinu í gær. Lofaði LaPierre því að NRA myndi aðstoða bandaríska skóla með öryggi án endurgjalds.

Trump sjálfur gekk enn lengra á fundi með löggæslufulltrúum í Hvíta húsinu í dag. Þar gerði hann að því skóna að hervæða þyrfti skóla í Bandaríkjunum og sagði engan grundvallarmun á þeim og herstöðvum. Hugmynd hans um að vopna kennara væri þar að auki ódýrari en að ráða vopnaða öryggisverði í skóla.

„Við verðum að gera skólana harðgerari, ekki mýkri. Svæði án byssna fyrir morðingja eða einhvern sem vill vera morðingi er eins og að fara að fá sér ís,“ sagði Bandaríkjaforseti og bætti við að landsmenn þyrftu að „verða klókir“ með svæði þar sem byssur eru ekki leyfðar.

Sakaði fjölmiðla um að „elska“ fjöldamorð

Talsmenn NRA á ráðstefnu íhaldsmannanna voru þó ekki hættir. LaPierre gagnrýndi alríkislögregluna FBI harðlega og kallaði stjórnendur hennar „stjórnlausa“. Endurómaði LaPierre þar árásir Trump og fleiri repúblikana á FBI sem hefur virst ætlað að grafa undan rannsókninni á því hvort að forsetaframboð Trump hafi átt í samráði við rússnesk stjórnvöld.

Þá fullyrti Dana Loesch, talskona NRA, sem einnig ávarpaði ráðstefnuna að meginstraumsfjölmiðlar í Bandaríkjunum „elskuðu“ fjöldamorð með skotvopnum.

„Ég er ekki að segja að þið elskið harmleikinn en ég er að segja að þið elskið áhorfið. Grátandi hvítar mæður eru áhorfsgull,“ sagði Loesch og beindi orðum sínum að fjölmiðlum í salnum.

Loesch hefur áður vakið athygli fyrir hatrammar árásir á fjölmiðla. Þannig kom hún fram í myndböndum fyrir samtökin þar sem hún hótaði dagblaðinu New York Times meðal annars og sagði blaðið í „leysimiði“ samtakanna.


Tengdar fréttir

Lifði af skotárásina og þjarmaði að þingmanni í sjónvarpssal

Cameron Kasky, einn þeirra nemenda Marjory Stoneman Douglas-framhaldsskólans sem hafa verið hvað háværastir í baráttu sinni fyrir hertri byssulöggjöf í Bandaríkjunum, gekk hart að öldungardeildarþingmanninum og Repúblikananum Mark Rubio í gær.




Fleiri fréttir

Sjá meira


×