Fýlan gerði Mahrez að betri leikmanni

Riyad Mahrez er betri leikmaður eftir útlegðina sem hann fór í eftir félagsskiptagluggann að mati knattspyrnustjóra Leicester, Claude Puel.

Mahrez mætti ekki á æfingar undir lok janúarmánaðar til þess að reyna að neyða í gegn sölu sína til Manchester City. Eftir að ekkert varð úr sölunni snéri hann ekki aftur heldur hélt áfram í sjálfskipaðri útlegð.

Hann snéri til baka á æfingu undir lok síðustu viku og kom inn sem varamaður í leik Leicester gegn City á laugardaginn.

Puel hefur áður sagt að hugur Mahrez sé allur hjá Leicester og að hann sé tilbúinn til þess að leggja sig allan fram fyrir félagið.

„Ég held hann sé betri [en hann var áður]. Hann hefur gaman af því að spila og æfa með liðsfélögum sínum, er á góðum stað án allra vandamála,“ sagði Puel.

„Við þurfum að hætta að tala um Riyad. Hann er kominn til baka, hann spilaði gegn City og við þurfum að halda áfram og skilja þetta mál eftir.“

Næsti leikur Leicester er bikarleikur gegn Sheffield United á morgun. Leikurinn verður í beinni útsendingu á Stöð 2 Sport 3 og hefst útsending klukkan 19:35.