Erlent

Trump segir útlit fyrir að árásarmaðurinn hafi átt við geðræn vandamál að stríða

Samúel Karl Ólason skrifar
Minnst sautján eru dánir og fimtán særðir eftir skotárás Nikolas Cruz.
Minnst sautján eru dánir og fimtán særðir eftir skotárás Nikolas Cruz. Vísir/Getty

Donald Trump, forseti Bandaríkjanna, segir útlit fyrir að þungvopnaður 19 ára maður sem skaut minnst sautján manns til bana í Marjory Stoneman Douglas skólanum í Flórída í gær hafi átt við geðræn vandamál að stríða. Trump segir honum hafa verið vikið úr skóla fyrir slæma og skringilega hegðu. Enn fremur sagði Trump að nauðsynlegt væri að tilkynna slíka hegðun til yfirvalda, „aftur og aftur“.

Þetta sagði forsetinn í tísti sem hann tengdi við annað tíst frá þriðjudeginum sem fjallaði um stjórnmáladeilur um málefni innflytjenda. Trump hefur áður sagt að ástæða þess að fjöldamorð með skotvopnum séu svo algeng í Bandaríkjunum tengist geðheilsu og komi fjölda skotvopna í landinu ekki við.

Árásarmaðurinn heitir Nikolas Cruz. Hann var handsamaður af lögreglu um klukkustund eftir árásina og er sagður svara spurningum lögregluþjóna. Hann hefur verið ákærður fyrir minnst sautján morð.

Eins og áður sagði eru minnst sautján dánir eftir að Nikolas Cruz gekk inn í fyrrverandi skólann sinn og skaut þar úr hálfsjálfvirkum riffli af gerðinni AR-15. Fimmtán eru særðir. Um er að ræða mannskæðustu skotrárásina í skóla í Bandaríkjunum í fimm ár.

Auk þess að vera vopnaður riffli var Cruz með mikið af skotum, gasgrímu og reyksprengjur sem hann notaði til að skapa glundroða í skólanum sem rúmlega þrjú þúsund nemendur sækja. Talið er að Cruz hafi komist af vettvangi með því að fela sig meðal nemenda sem flúðu skólann í hundruðatali.

Cruz og yngri hálfbróðir hans voru ættleiddir af Lyndu og Roger Cruz þegar þeir voru ungabörn. Lynda Cruz lést úr lungnabólgu í nóvember og Roger úr hjartaáfalli fyrir nokkrum árum.

Nikolas Cruz. Vísir/EPA

Þegar hefur komið í ljós að nemendur skólans grínuðust sín á milli með það að ef einhver myndi gera árás á skólann yrði það Cruz. 

Jim Gard, sem kennir stærðfræði í skólanum, sagði Washington Post að Cruz hefði bara verið ósköp venjulegur unglingur. Hann hefði ekki verið með læti í tímum og hefði hagað sér eðlilega. Hins vegar hefðu stjórnendur skólans sent út tölvupóst í fyrra þar sem kennarar voru beðnir um að fylgjast með honum.

Sömuleiðis segjast hjónin sem hann bjó hjá að hann hefði ekki sýnt neina hegðun sem gæfi í skyn að hann gæti verið svo ofbeldisfullur. Hann hafi verið þunglyndur og en aldrei beitt ofbeldi.

Lögreglan segir þó að Cruz hafi sýnt „mjög, mjög óhugnanlega“ hegðun á samfélagsmiðlum. Blaðamenn Washington Post fundu Instagram síðu hans og þar hafði Cruz birt margar myndir af skotvopnum og minnst eina mynd af dauðum froski sem hann virtist hafa skotið.

Blaðamenn CNN segja hann hafa sett inn athugasemdir á YouTube og víðar að hann hafi viljað skjóta fólk með riffli sínum., að hann vildi deyja á sama tíma og hann myrti fullt af fólki og að hann vildi skjóta myrða lögregluþjóna.

Skotárásir í Bandaríkjunum eru mjög tíðar og þá virðast sérstaklega mörg fjöldamorð hafa verið framin í skólum þar í landi. AP fréttaveitan hefur tekið saman upplýsingar um árásir undanfarinna ára.

-23. janúar 2018: Tveir nemendur dóu og fjórtán særðust þegar nemandi hóf skothríð við upphaf skóladags í Kentucky. Verið er að íhuga að rétta yfir fimmtán ára árásarmanninum sem fullorðnum aðila.

-7. desember 2017: Tveir nemendur eru skotnir til bana af árásarmanni sem klæddi sig eins og nemandi í skóla í New Mexico. Árásarmaðurinn skaut sig svo til bana.

Yfirlit yfir mannskæðustu skotárásir Bandaríkjanna. Vísir/GraphicNews

-13. september 2017: Fimmtán ára drengur dó og þrjár stúlkur særðust þegar annar fimmtán ára drengur skaut úr skammbyssu í skóla í Washington.

-10. apríl 2017: Maður hóf skothríð í sérkennslu í skóla í Kaliforníu þar sem eiginkona hans vann. Hún og átta ára drengur dóu í árásinni og annað barn særðist. Maðurinn skaut sig svo til bana.

-28. september 2016: Sex ára drengur dó á leikvelli við skóla í Suður-Karólínu þegar fjórtán ára drengur hóf þar skothríð. Drengurinn hafði þá einnig skotið faðir sinn til bana og særði hann annað barn og kennara. Hann var ákærður fyrir morð.

-8. september 2016: Fjórtán ára stúlka skaut sig til bana eftir að hafa skotið og sært aðra stúlku í skóla í Texas.

-14. desember 2012: Tuttugu ára gamall maður myrti 20 börn og sex kennara í Sandy Hook skólanum í Connecticut. Áður hafði hann myrt móður sína. Eftir árásina skaut hann sig til bana.

-27. febrúar 2012: Þrír nemendur dóu og teir særðust í skotárás í skóla í Ohio. Réttað var yfir árásarmanninum, sem var sautján ára gamall, sem barni.

-16. apríl 2007: Hinn 23 ára gamli Seung-Hui Cho myrti 32 á skólalóð Virgina Tech háskólans áður en hann svipti sig lífi.

-20. apríl 1999: Þeir Eric Harris, 18, og Dylan Klebold, 17, myrtu tólf nemendur og kennara í Columbine skólanum í Colorado. Þeir særðu einnig 26 manns áður en þeir skutu sig til bana.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.