Heilsuvísir

Hvað er svona hættulegt við kannabis?

Lára G. Sigurðardóttir. skrifar
Lára G. Sigurðardóttir, læknir og doktor í lýðheilsuvísindum.
Lára G. Sigurðardóttir, læknir og doktor í lýðheilsuvísindum.

Lesendum Vísis og Fréttablaðsins gefst kostur á því að senda sérfræðingum spurningar tengdar heilsu og lífsstíl á netfangið heilsanokkar@frettabladid.is. Í hverri viku birtast svör við völdum spurningum í Fréttablaðinu og hér á Vísi.

Spurning: Hvað er svona hættulegt við kannabis?

Svar: Kannabis er algengasta ólöglega fíkniefnið og flestir sem reykja kannabis er ungt fólk. Sumir telja það saklaust því í litlum skömmtum koma sjaldan fram alvarlegar aukaverkanir. En það er með kannabis eins og önnur fíkniefni, að ekki er hægt að sjá fyrir um hverjir hljóta skaða af neyslunni en almennt gildir að við mikla og langvarandi neyslu eykst hættan.

Fólk undir áhrifum kannabis getur upplifað breytta skynjun (t.d. sjá bjartari liti), aukna matarlyst, kvíða, minnisskerðingu, ofskynjanir og geðrof. Mikil ógleði og uppköst geta einnig komið fram.

Við langvarandi neyslu getur kannabis skert greind ungmenna. Þegar heilinn er að taka út þroska myndar hann sífellt ný taugamót og samkvæmt dýrarannsóknum truflar kannabis myndun nýrra taugamóta. Afleiðingarnar geta verið erfiðleikar með einbeitingu og að festa minningar í sessi. Sýnt hefur verið fram á að vitsmunagetan sem tapast kemur ekki aftur þegar kannabisneyslu er hætt. Þessi áhrif virðast ekki eiga við um fullorðið fólk.

Kannabis getur valdið öndunarfæravandamálum líkt og tóbaksreykingar og einnig hröðum hjartslætti, sem getur aukið hættu á hjartaáfalli. Kannabis getur líka valdið ofsóknaræði og geðsjúkdómum eins og geðklofa, kvíða og þunglyndi og aukinni hættu á sjálfsvígum. Jafnframt eru þeir sem nota kannabis líklegri til að fá geðrofssjúkdóma eins og geðklofa. Ef kannabis er neytt á meðgöngu eða á tíma brjóstagjafa getur það valdið þroskavandamálum hjá barninu.

Varhugavert er að styrkleiki vímugjafans THC í kannabis hefur verið að aukast jafnt og þétt síðustu áratugi, sem þýðir að sá sem byrjar að reykja kannabis í dag innbyrðir mun meira af THC en tíðkaðist t.d. á hippaárunum. Ljóst er að kannabis er skaðlegt efni sem getur haft óafturkræf og alvarleg áhrif á heilsuna. Hægt er að fá frekari upplýsingar á vefnum kannabis.is.

NIÐURSTAÐA: Kannabis getur verið skaðlegt á nokkra vegu, meðal annars með því að auka líkur á geðsjúkdómum og valda óafturkræfri greindarskerð- ingu meðal ungmenna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.