Tíska og hönnun

Ganga skrefinu lengra

Hjónin Ágústa Magnúsdóttir og Gústav Jóhannsson eru eigendur húsgagnahönnunar- og framleiðslufyrirtækisins AGUSTAV.
Hjónin Ágústa Magnúsdóttir og Gústav Jóhannsson eru eigendur húsgagnahönnunar- og framleiðslufyrirtækisins AGUSTAV. Vísir/Anton Brink
Nýjasta vara húsgagnahönnunar- og framleiðslufyrirtækisins AGUSTAV er fallegur trébekkur úr gegnheilum við með svörtum stálfótum. Gústav Jóhannsson, annar helmingur fyrirtækisins, segir að hugmyndina að honum hafa verið lengi að mótast hjá þeim.

„Við sýndum hugmyndina að honum fyrst á sýningu síðasta sumar en náðum svo loks að klára útfærsluna og bjóða upp á hana sem part af vöruúrvalinu okkar um miðjan október. Við höfum prófað okkur áfram með ýmsar viðartýpur og bjóðum nú upp á bekkinn í eik, hnotu og mahóní. Engar skrúfur eða naglar eru í bekknum heldur stendur hann á spennunni einni saman.“

Nýi trébekkurinn er úr gegnheilum við með svörtum stálfótum. Vísir/Anton Brink

Nýtist víða

Hinn helmingur fyrirtækisins, Ágústa Magnúsdóttir, segir bekkinn tilvalinn á ganginn, við enda rúmsins, við borðstofuborðið eða hvar sem vantar bekk á heimilið.

„Undirstuðningurinn nýtist svo einnig vel sem hilla fyrir skó, box, körfur eða annað. Viðtökurnar á bekknum hafa verið framar öllum vonum og það er gaman að sjá hvað fólki dettur í hug að nota hann á marga mismunandi vegu.“

Ágústa og Gústav eru hjón og hafa rekið fyrirtækið saman frá árinu 2011 en þau fluttu heim árið 2014 eftir margra ára dvöl í Danmörku og á Ítalíu.

Engar skrúfur eða naglar eru í bekknum heldur stendur hann á spennunni einni saman.Vísir/Anton Brink

Mikilvægur vettvangur

Það styttist í Hönnunarmars sem þau segja að hafi alltaf verið mikilvægur vettvangur til að vekja athygli á sér.

„Það er gulls ígildi að eiga nokkra daga á ári þar sem stór hluti íbúa landsins og erlendir gestir flykkjast um bæinn með það að markmiði að kynna sér hvað er í boði.“

Í ár munum þau standa fyrir sýningu í nýju sýningarrýmið þeirra og Kjartans Óskarssonar á Funahöfða 3.

„Þar ætlum við að kynna bæði sýningarrýmið og verkstæðið og kynna um leið hugmyndafræðina sem við vinnum út frá. Að sjálfsögðu munum við einnig kynna nýjar vörur, m.a. nýjan stól sem við erum mjög spennt fyrir. Þessi þróunartími er einhver skemmtilegasti tími ársins og við viljum alltaf koma með fleiri vörur en færri en við sjáum hvernig þetta þróast í ár hjá okkur.“

Mæliprikið er ný vara. Hægt er að panta það í fæðingarlend barns, sem gestgjafaprik með mælilengdum borðdekkingar og sem mæliprik í ákveðinni lengd. 

Ný hugmynd

Fyrir utan nýjar vörur hyggjast þau einnig kynna nýja hugmynd sem leiðir af sér hálfgerða vörulínu.

„Við höfum alltaf verið mjög upptekin af því að passa upp á umhverfið í framleiðslunni okkar og m.a. gróðursett tré fyrir hverja selda vöru. Nú viljum við taka þetta skrefinu lengra. Við höfum reynt að minnka affall frá okkur eins og við getum og nýtt allt efni eins vel og hægt er. Við köllum nýju hugmyndina okkar AFGANGAR og gengur hún út á að þaulnýta alla afganga sem falla til á verkstæðinu til framleiðslu á nýjum vörum.“

Þau eru nú þegar komin með nokkrar litlar heimilis- og lífsstíls vörur, allar unnar úr afgögnum sem þau ætla að kynna og bjóða til sölu á Hönnunarmars.

„Með þessu móti minnkum við rusl og nýtum afurðir til fulls og getum um leið framleitt smærri vörur á hagstæðu verði. Allir græða!“

Nánar má kynna sér hönnun þeirra á AGUSTAV.is og á Facebook.






Fleiri fréttir

Sjá meira


×